Thirrjet e tifozëve serbë në ‘Euro 2024’, FFK-ja reagon në UEFA
Federata e Futbollit e Kosovës (FFK) ka njoftuar se reaguar zyrtarisht në Federatën Europiane të Futbollit (UEFA) për shkak të siç kanë thënë “shfaqjes së flamujve, sloganeve dhe thirrjeve të tifozëve serbë me mesazhe politike, shoviniste dhe raciste kundër Kosovës”, gjatë ndeshjes Serbi – Angli, në kuadër të Euro 2024.
Sipas FFK-së, shfaqja e papenguar e mesazheve dhe thirrjeve të tilla në një event madhështor si Euro 2024 është e pakuptimtë dhe absurde.
“Përmes thirrjeve të tilla dëshmohet urrejtja e mbjellë në opinionin publik në Serbi ndaj fqinjve të saj”- thuhet mes tjerash në reagim.
FFK-ja më tej shton se në ankesën e paraqitur me dëshmitë e nevojshme në UEFA, ka kërkuar masa të rrepta disiplinore ndaj Federatës së Futbollit të Serbisë, si recidiviste e rasteve të tilla.
“Njëkohësisht, kërkojmë vigjilencë nga organizatori për të evituar shfaqjen e banderolave të tilla në ndeshjet e ardhshme, pasi ato përbëjnë shkelje të rëndë të rregullave të UEFA-së.Thirrjet kundër shtetit të Kosovës në një event madhor si Euro 2024 janë motivim për grupet nacionaliste dhe kërcënojnë sigurinë, edhe ashtu të brishtë të rajonit” – theksohet në reagim.
Federata e Futbollit të Kosovës thotë se “qëndron fuqishëm në mbrojtje të vlerave të futbollit dhe promovimit të asaj që UEFA përfaqëson: unitet, gjithpërfshirje dhe pasion për lojën e futbollit, por njëherësh me vendosmëri mbron edhe dinjitetin e shtetit, që është krijuar me shumë mund e sakrificë.”
“I bëjmë thirrje UEFA-së që persona me sjellje dhe filozofi të urrejtjes ndaj një populli dhe shteti tjetër të mos kenë vend në arenat e futbollit. Futbolli dhe eventet e tilla si Euro 2024 nuk duhet t’u shërbejnë shovinistëve e racistëve për promovim të gjuhës së urrejtjes”- pëefundon reagimi.
Mediat në Kosovë raportuan se gjatë ndeshjes Serbi-Angli më 16.06.2024, në grupet e tifozerive serbe u panë flamuj të Serbisë me hartë të Kosovës.
Kampionati Europian i futbollit do të mbahet deri më 14.07.2024 në Gjermani.
