Rrëfimi në ‘Reporting House’ i fotografit serb që dokumentoi luftën në Kosovë

Fotografi serb, i cili punoi për agjencinë “Reuters” derisa ishte duke mbuluar dhe dokumentuar luftën e Kosovës në vitet e 90-ta, Goran Tomasheviq, ka mbajtur diskutim në Reporting House, të hënën më 23.09.2024.

Ai ka folur për përvojat e tij si fotograf dhe reporter në Kosovë gjatë viteve të 90-ta.

Gjatë diskutimit Tomasheviq ka folur për ngjarjet që fotografoi për gjatë gjithë luftës në Kosovë .

“Vareshim shumë nga linjat telefonike dhe 20 minuta duheshin për ta dërguar nj fotografi të vetme”.

Tomasheviq, thotë se gjatë bombardimit tremujor të NATO-s, kishte dokumentuar nga afër viktimat në Burgun e Dubravës, e që sipas tij ishin rreth 100 viktima, të cilat ai i kishte parë nga afër dhe i kishte xhiruar.

“NATO e ka goditur burgun dhe ne shkuam aty, kemi gjetë shumë kufoma, nuk e di se kush i kishte nxjerrë dhe kush i kishte futur ne dhomë, kishte pasur shumë dëme, ne bëmë çka mundëm, i pamë disa armë, pajisje të mjekësisë të shkatërruara, mure të shkatërruara, i citova disa burime dhe u ktheva në Prishtinë”- ka thënë Tomasheviq.

Goran Tomasheviq thotë se nuk i kishte parë duke ndodhur vrasjet në burgun e Dubravës. Ai thotë se kishte shkuar vetëm pasi kishin përfunduar bombardimet atje, andaj dhe thotë se nuk është i sigurt se kush i kishte kryer ato vrasje.

“Nuk i mbaj në mend mirë datat dhe ngjarjet. Nuk kam mundur të shkoj sa herë kam dashur, kam marrë aq sa kam mundur. Unë nuk i kam parë vrasjet duke ndodhur në burg të Dubravës. Në Dubravë kam parë shumë njerëz të vrarë, dëme nga bormbadimet, por kush i kishte vrarë ata njerëz?”- është shprehur Tomasheviq. 

Fotografi serb në Kosovë, foli edhe për bombardimet, në Institutin e Shëndetit Mendor në Shtime, ku thotë se ishte prezent pas bombardimeve në këtë vend, i cili realizoi disa fotografi të ngjarjes.

Sipas tij, në situata lufte siç ishte Kosova në vitet e 90-ta, gjersa ai ishte prezent dhe dokumentoi, fotografia është më e rëndësishme sesa raportimet e tjera nga një vend në një zonë lufte.

“Besoj se fotografia është më e rëndësishme se historia”- ka përfunduar Tomasheviq.

Goran Tomasheviq, fotograf serb, punoi për agjencinë “Reuters” gjersa ishte duke mbuluar luftën e Kosovës në vitet 90-ta dhe që nga viti 2002 punon për “Globe and the Mail”.

Sipas një komunikatë të Reporting Houese, Tomasheviq ishte fotografi i vetëm që u lejua të qëndrojë në Kosovë, duke punuar për shtypin ndërkombëtar.

Tomasheviq kaloi më shumë se 30 vite duke udhëtuar rreth botës për të mbuluar storiet më të mëdha botërore që përfshinë Irakun, Afganistanin, Libinë dhe Sirinë. Për punën e tij ai u nderua me shumë çmime ndërkombëtare, ndër ta edhe çmimin “Pulitzer”.

Përvoja e tij e gjerë, përfshinë publikime fotografike nga Ukraina, Sudani i Jugut, Pakistani, Mozambiku, Republika Demokratike e Kongos, Republika e Afrikës Qendrore, Borundi, Nigeria si dhe mbulim i sportit në Lojërat Olimpike dhe në Kupa të Botës.