![](https://kallxo.com/wp-content/uploads/2019/11/Policia-1-695x310.jpg)
Foto: Policia e Kosovës/Facebook
Policia thotë se do ta zbatojë vendimin e qeverisë
Policia e Kosovës ka thënë se do të zbatojë të gjitha vendimet të cilat merren nga ana e organeve kompetente në këtë rast edhe vendimin e fundit të Qeverisë së Kosovës.
Njëri nga vendimet e marra në mbledhjen e ditës së djeshme është edhe vendimi për ndalimin e qarkullimit të qytetarëve dhe automjeteve nga ora 10:00 deri në ora 16:00 pasdite dhe nga ora 20 deri në orën 6:00 të mëngjesit.
Një vendim të tillë do ta zbatojë dhe Policia e Kosovës.
“Policia e Kosovës nuk komenton apo interpreton asnjë vendim, Policia e Kosovës është institucion i zbatimit të ligjit dhe të gjitha vendimet e lëshuara nga organet kompetente, sipas detyrës dhe autorizimeve policore i zbaton”, thuhet në njoftimin e PK-së.
Tutje në njoftim thuhet se Policia e Kosovës referuar situatës dhe rrethanave të krijuara në Kosovë nga pandemia, me kohë ka hartuar urdhrin operativ të cilin tanimë e ka në implementim, ku të gjitha aktivitetet dhe masat i ndërmerr në koordinim të plotë me të gjitha institucionet kompetente në fushën e shëndetësisë dhe institucionet tjera relevante, konform angazhimeve dhe detyrave të harmonizuara sipas planit për gatishmëri dhe reagim.
“Njëkohësisht Policia e Kosovës, koordinon aktivitetet e saja me Grupin Ndër-institucional për Menaxhimin e Incidenteve pranë Ministrisë së Punëve të Brendshme dhe Administratës Publike”, thuhet në fund të njoftimit.
KALLXO.com, raportoi mëngjesin e sotëm se dhomave komanduese në gjithë rajonet e Kosovës kanë marrë një email në të cilin nuk është përshkruar asgjë përveç vendimit të bashkangjitur me masat e reja.