Pentagoni shkarkon Shefin e Agjencisë së Sigurisë Kombëtare
Shefi i Agjencisë së Sigurisë Kombëtare dhe të Komandës Kibernetike të Shteteve të Bashkuara të Amerikës është shkarkuar nga puna të enjten – sipas kohës lokale amerikane – kanë bërë të ditur zyrtarët më të lartë demokratë në Komitetet e Kongresit për Inteligjencën – raporton The New York Times.
Senatori nga Virxhinia, Mark Warner dhe Jim Himes, përfaqësues i Connecticutit në Dhomën e Përfaqësuesve, kanë dënuar shkarkimin e gjeneralit Timothy D. Haugh, i cili i kishte prirë edhe Agjencisë së spiunimit, edhe Komandës ushtarake.
Ky Vendim i ka zënë në befasi zyrtarët e Inteligjencës amerikane.
Një zëdhënëse e Komandës kibernetike ka thënë se nuk mund ta konfirmojë shkarkimin e gjeneralit Haugh dhe ka kërkuar që pyetjet t’i dërgohen Pentagonit, që nuk i është përgjigjur kërkesës së The Times për koment. Edhe zëdhënësja e Shtëpisë së Bardhë nuk i është përgjigjur pyetjes për konfirmimin e shkarkimit të Haugh.
Por, një zyrtar amerikan i intervistuar për këtë çështje ka thënë se Laura Loomer, aktiviste e së djathtës ekstreme dhe Këshilltare e Jashtme e presidentit Donald Trump, gjatë takimit që kishte pasur të enjten në Zyrën Ovale të Shtëpisë së Bardhë, kishte kërkuar shkarkimin e gjeneralit Haugh. Zyrtari ka thënë se presidenti Trump e urdhëroi sekretarin e Mbrojtjes Pete Hegseth që ta shkarkojë gjeneralin Haugh.
Gjenerali Haugh ishte konsideruar nga Administrata Trump si udhëheqës që po zvarriste Vendimet për eliminimin e Programeve të diversitetit.
Himes, demokrati i lartë në Komitetin për Inteligjencë të Dhomës së Përfaqësuesve, ka thënë se publiku amerikan meriton një shpjegim për këtë Vendim të papritur.
Tre zyrtarët e intervistuar për çështjen e gjeneralit të shkarkuar ishin informuar për Vendimin, derisa ndodheshin në udhëtim. Ish-zyrtarë dhe zyrtarët aktualë kanë thënë se edhe zëvendësja e gjeneralit Haugh në Agjencinë e Sigurisë Kombëtare Wendy Noble është shkarkuar nga posti i saj dhe mbase është zhvendosur në një detyrë tjetër në Pentagon.
Përgatiti: Rexhep Maloku – Kallxo.com
