Kurti udhëton për në ShBA

Kryeministri i Kosovës, Albin Kurti ka udhëtuar drejt Shteteve të Bashkuara të Amerikës.

Kështu ka bërë të ditur Zyra e Kryeministrit përmes një komunikate për media.

Kurti do të marrë pjesë në Konventën Kombëtare Demokratike, e cila nis më 19.08.2024, e cila zhvillohet në Çikago. 

Sipas njoftimit të kryeministrit Kurti do të jetë pjesëmarrës dhe në një panel diskutimi me titull “Konventa Kombëtare Demokratike dhe Roli i Partive Politike”. 

Përgjatë qëndrimit në ShBA, kryeministri do të ketë edhe takime të ndryshme bilaterale, njofton ZKM.

Paneli do të hapet nga kryesuesi i bordit drejtues të NDI, Tom Daschle, dhe do të moderohet nga Presidentja e NDI, Tamara Wittes, e ku ndër të tjerë pjesë e panelit do të jetë dhe ish-Sekretari i NATO-s, Lord George Robertson dhe Donna Brazile, ish-drejtuese e Komitetit Kombëtar Demokrat dhe tashmë pjesë e bordit të NDI. 

Ky udhëtim ndodhi në një kohë kur në Kosovë po diskutohet se Kurti ka prishur marrëdhëniet me Amerikën për shkak të ‘veprimeve të njëanshme dhe të pakoordinuara’ për veprimet në veri.