![](https://kallxo.com/wp-content/uploads/2023/01/Flamuri-i-Kosoves-dhe-i-Izraelit-foto-Hajrulla-Ceku-facebook-720x480.jpg)
Izraeli uron Pavarësinë, pret thellim të marrëdhënieve mes dy vendeve
Ministria e Punëve të Jashtme të Izraelit, ka uruar 15 vjetorin e shpalljes së Pavarësisë së Kosovës.
Përmes një postimi në Twitter, Ministria e Punëve të Jashtme në Izrael thotë se presin thellimin e marrëdhënieve mes dy vendeve në vitet në vijim.
“Urime 15 vjetorin e Pavarësisë së Republikës së Kosovës, presim thellimin e marrëdhënieve tona në vitet në vijim”- shkruan ministria.
Në 15 vjet shtetësi, Republika e Kosovës është njohur nga 117 shtete të botës, sipas të dhënave të Ministrisë së Punëve të Jashtme dhe Diasporës.
Shteti i fundit në listë që ka njohur pavarësinë e vendit është Izraeli, më 1 shkurt të vitit 2021.
Njohja nga ky vend erdhi nga marrëveshja e Uashingtonit mes Kosovës dhe Serbisë, nënshkruar më 4 shtator të vitit 2020.
Kjo marrëveshje bëri bujë, pasi ndonëse solli njohjen nga Izraeli, për një vit stopoi aplikimet e Kosovës në organizata ndërkombëtare, sipas moratoriumit të rënë dakord mes palëve.
Për Serbinë, thuhej se “do të pajtohet ta zbatojë një moratorium njëvjeçar mbi fushatën e saj për çnjohje dhe do të përmbahet nga kërkesa zyrtare ose jozyrtare ndaj ndonjë vendi ose organizate ndërkombëtare, që të mos e njohë Kosovën (Prishtinën) si shtet të pavarur”.
Marrëveshja ishte nënshkruar nga ish-kryeministri i Kosovës, Avdullah Hoti dhe presidenti i Serbisë, Aleksandar Vuçiq, me ndërmjetësim të ish-presidentit të SHBA-së, Donald Trump.
Ndërkaq, sot janë bërë 15 vjet nga shpallja e pavarësisë së Kosovës.
Shpallja e Pavarësisë së Kosovës është bërë më 17 shkurt të vitit 2008 në ora 15:39 në Kuvendin e Republikës së Kosovës në Prishtinë.
Në një mbledhje të jashtëzakonshme ku merrnin pjesë 109 nga gjithsej 120 deputetë, Kuvendi i Kosovës njëzëri shpalli Kosovën shtet të pavarur, sovran dhe demokratik.
Congratulations on the Republic of Kosova’s 15th anniversary of Independence, looking forward to deepening our relations in the years to come. pic.twitter.com/vWcaskhqwK
— Israel ישראל (@Israel) February 17, 2023