Isa Mustafa reagon për mungesën e Vjosa Osmanit në Kuvend dhe Albin Kurtit në dorëzim të detyrës

Kryetari i Lidhjes Demokratike të Kosovës, Isa Mustafa, e ka quajtur të papërgjegjshëm mos-drejtimin e seancës nga kryetarja e Kuvendit Vjosa Osmani, ku u votua Hoti si kryeministër.

Njëjtë e ka quajtur edhe mosdorëzimin e detyrës së kryeministrit nga Albin Kurti te Avdullah Hoti.

Mustafa përmes një publikimi në Facebook ka thënë gjithashtu se Kurti para se ta shkarkonte Hotin nga pozita e zëvëndëskryeministrit e ka shkarkuar veten.

Mustafa tutje ka thënë se pamja e sotme e kryeministrit Hoti, i vetëm para FSK, pa Kurtin, tregon se para vetes nuk ka pasur një kryeministër.

“Bojkotimi i bashkërenditur i znj. Vjosa Osmani, Kryetare e Kuvendit dhe z. Albin Kurti, ish Kryeministër, nuk iu bëri punë. E para iku nga përgjegjësia ta drejtojë seancën e Kuvendit, në të cilën bashkëpartiaku i saj i LDK-së do të votohej për Kryeministër, kurse partia e saj, LDK, ku akoma është nënkryetare, do ta drejtonte koalicionin qeverisës. Veprim i papresedan dhe i papërgjegjshëm. Sot, Albin Kurti i iku përgjegjësisë t’ia dorëzojë detyrën Kryeministrit Hoti. Deklarata e tij se nuk ia dorëzon detyrën njeriut qe e ka shkarkuar është e ulët dhe e pasaktë. Në fakt para se ta shkarkonte z. Hoti nga pozita e zëvendëskryeministrit të parë, Kurti e shkarkoi vetëveten me votën e mbi 2/3 të deputetëve. Pamja e mëngjesit të sotëm e Kryeministrit Hoti, në ceremoninë e nderit të njësisë së FSK-së, flet qartë se para tij nuk kishte Kryeministër. Sepse çdo kryeministër me sjellje normale do t’ia dorëzonte detyrën pasardhësit të tij”, ka shkruar Mustafa.

Do NOT follow this link or you will be banned from the site!