“Human Rights Watch” thotë se mohimi i qasjes në ujë në Gazë nga Izraeli është akt gjenocidi
“Human Rights Watch” ka thënë, të enjten, më 19.12.2024, se Izraeli ka vrarë mijëra palestinezë në Gazë, duke ua mohuar qasjen në ujë të pastër, që sipas kësaj organizate, ligjërisht përbën akt gjenocidi e shfarosjeje – ka raportuar Reuters.
“Kjo politikë e shkaktuar si pjesë e një vrasjeje masive të civilëve palestinezë në Gazë, do të thotë se autoritetet izraelite kanë kryer ‘krimin kundër njerëzimit të shfarosjes”, i cili po vazhdon. Kjo politikë përbën, gjithashtu, një ‘akt gjenocidi’, sipas Konventës së Gjenocidit të vitit 1948.” – thuhet në raportin “Human Rights Watch”.
Izraeli hedh poshtë akuzat
Izraeli e ka hedhur vazhdimisht çdo akuzë për gjenocid, duke thënë se ka respektuar të drejtën ndërkombëtare dhe se ka të drejtë të mbrohet pas sulmit ndërkufitar të “Hamasit”, nga Gaza më 7 tetor 2023, i cili përshpejtoi luftën.
Megjithëse, Raporti e përshkruan privimin e ujit si ‘një akt gjenocidi’, vë në dukje se vërtetimi i krimit të gjenocidit kundër zyrtarëve izraelitë do të kërkonte gjithashtu argumentimin e qëllimit të tyre. Raporti ka cituar deklaratat e disa zyrtarëve të lartë izraelitë, të cilët tha se sugjeronin se ata “dëshirojnë të shkatërrojnë palestinezët”, që do të thotë se privimi i ujit “mund të jetë krim i gjenocidit”.
“Ajo që ne kemi gjetur është se Qeveria izraelite është duke vrarë qëllimisht palestinezët në Gaza, duke u mohuar atyre ujin që u nevojitet për të mbijetuar.” – ka thënë në një Konferencë për shtyp Lama Fakih, drejtore e “Human Rights Watch” për Lindjen e Mesme.
“Human Rights Watch” është grupi i dytë i madh i Të drejtave i cili në një muaj përdor fjalën ‘gjenocid’, për të përshkruar veprimet e Izraelit në Gazë, pasi “Amnesty International” nxori një Raport, që konkludoi se Izraeli po kryente gjenocid.
Të dy Raportet erdhën vetëm disa javë pasi Gjykata Penale Ndërkombëtare lëshoi urdhër arresti për kryeministrin izraelit, Benjamin Netanyahu dhe ish-Shefin e tij të mbrojtjes për krime të dyshuara lufte dhe krime kundër njerëzimit. Ata i mohojnë akuzat.
Çfarë thotë Konventa e Gjenocidit?
Konventa e Gjenocidit e vitit 1948, e miratuar në vazhdën e vrasjes masive të hebrenjve në Holokaustin nazist, e përkufizon krimin e gjenocidit si “akte të kryera me qëllim për të shkatërruar, tërësisht ose pjesërisht, një grup kombëtar, etnik, racor ose fetar.”
Raporti prej 184-faqesh i “Human Rights Watch” shkruan se Qeveria izraelite ndaloi dërgimin e ujit në Gazë e ndërpreu energjinë elektrike dhe kufizoi karburantin, që nënkuptonte se objektet e ujit e kanalizimeve të Gazës nuk mund të përdoren.
Si rezultat, palestinezët në Gaza kishin qasje vetëm në disa litra ujë në ditë, në shumë zona. Shumë më pak pragut prej 15 litrash për mbijetesë – thuhet në Raportin e grupit për mbrojtjen e të drejtave të njeriut.
Izraeli filloi luftën e tij ajrore dhe tokësore në Gazë, pasi luftëtarët e udhëhequr nga “Hamasi” sulmuan komunitetet izraelite, përtej kufirit 14 muaj më parë – duke vrarë 1.200 njerëz e duke marrë mbi 250 pengje përsëri në Gazë – sipas raporteve izraelite.
Fushata e Izraelit ka vrarë më shumë se 45.000 palestinezë, ka zhvendosur pjesën më të madhe të popullsisë prej 2.3 milionëve dhe ka shkatërruar pjesën më të madhe të enklavës bregdetare në gërmadha.
Përgatiti: Rexhep Maloku – Kallxo.com
