Gjykimi për falsifikim të dokumentit zyrtar, i akuzuari Asllan Hajdini deklarohet rreth fajësisë

Është mbajtur seanca e shqyrtimit fillestar më 02.04.2025, në Gjykatën e Prishtinës, ndaj Asllan Hajdinit i cili po akuzohet për falsifikim të dokumentit zyrtar.

I pandehuri Asllan Hajdini po akuzohet se në cilësinë e personit zyrtar, inspektor i punës në Ministrinë e Financave, Punës dhe Transfereve, ka falsifikuar dokumentin zyrtar – Raport, ashtu që edhe pse kishte qenë në dijeni se P.H. kishte pasur lëndime pasi ishte rrëzuar në vendpunishte Dioni Construction ka falsifikuar dokumentin zyrtar – duke shënuar të dhëna të rreme kinse i dëmtuari P.H. është rrëzuar në shtëpinë e tij, e jo në vendpunishte Dioni Contruction.

Pas leximit të Aktakuzës nga prokurorja Fitore Sadikaj, i akuzuari Asllan Hajdini u deklarua rreth fajësisë.

I akuzuari Asllan Hajdini deklaroi se nuk e pranon fajësinë për akuzën që i vihet në barrë nga organi i akuzës.

Tutje, gjyqtari Agim Kuqi njoftoi të pandehurin dhe mbrojtësin e tij që në afat prej 30 ditësh kanë të drejtë për kundërshtim të provave dhe Kërkesë për hudhje të Aktakuzës.

Dosja e Prokurorisë

Sipas Aktakuzës së datës 29.09.2023, i pandehuri Asllan Hajdini po akuzohet se në cilësinë e personit zyrtar, inspektor i punës në Ministrinë e Financave, Punës dhe Transfereve, ka falsifikuar dokumentin zyrtar – Raport zyrtar për hetim të aksidentit të datës 05.06.2023.

Sipas Aktakuzës, më 30.05.2023, në Gllogoc, në vendpunishten Dioni Construction ishte rrëzuar punëtori – i dëmtuari P.H., i cili kishte pësuar lëndime trupore, mirëpo i pandehuri Hajdini pasi kishte dalë në vendin e ngjarjes, në cilësinë e inspektorit të punës më 30.05.2023 dhe më 01.06.2023, edhe përkundër faktit se kishte qenë i njoftuar për gjendjen reale, i njëjti duke e ditur gjendjen faktike ka falsifikuar dokumentin zyrtar duke shënuar të dhëna të rreme, kinse i dëmtuari P.H. është rrëzuar në shtëpinë e tij, e jo në vendpunishte Dioni Contruction, të cilin dokument e kishte vërtetuar me nënshkrim dhe vulë.

Me këtë i pandehuri Asllan Hajdini po akuzohet se ka kryer veprën penale “falsifikim i dokumentit zyrtar”.