Gjykata e Moskës ia vazhdon dënimin gazetarit të ‘Wall Street Journal’, Evan Gershkovich

Një gjykatë në Moskë ia ka vazhduar paraburgimin gazetarit të ‘Wall Street Journal’ Evan Gershkovich deri në fund të qershorit, sipas zyrtarëve të gjykatës, pasi ai përballet me akuza për spiunazh në Rusi, shkruan agjencia e lajmeve evropiane, Euronews.

Gazetari 32-vjeçar amerikan, i cili u arrestua në fund të marsit 2023 gjatë një detyre raportimi, ka kaluar afër një vit pas grilave.

Si Gershkovich ashtu edhe punëdhënësi i tij kanë mohuar me forcë akuzat e ngritura kundër tij, me qeverinë e Shteteve të Bashkuara që e shpalli paraburgimin e tij si të padrejtë.

Arrestimi i Gershkovich në Yekaterinburg shkaktoi valë tronditëse në komunitetin gazetaresk në Rusi, ku autoritetet ende nuk kanë zbuluar ndonjë provë thelbësore që mbështeste akuzat për spiunazh.

Aktualisht i mbajtur në burgun famëkeq Lefortovo të Moskës, i njohur për kushtet e tij të rënda, rasti i Gershkovich e ka tërhequr vëmendjen në mes të tensioneve të përshkallëzuara midis Rusisë dhe Shteteve të Bashkuara mbi veprimet ushtarake të Kremlinit në Ukrainë.

Vëzhguesit spekulojnë se Moska mund t’i përdorë amerikanët e arrestuar si mjete pazari në marrëdhëniet e tensionuara diplomatike midis dy vendeve. Veçanërisht, të paktën dy shtetas amerikanë të arrestuar më parë në Rusi, përfshirë yllin e NBA, Brittney Griner, u shkëmbyen me rusë të burgosur në Shtetet e Bashkuara.

Situata e Gershkovich shënon rastin e parë të arrestimit të një gazetari amerikan me akuza spiunazhi në Rusi që nga shtatori i vitit 1986, kur Nicholas Daniloff, në atë kohë korrespondent i Moskës për US News and World Report, u arrestua nga KGB.

Daniloff u lirua pa akuza pas 20 ditësh në një shkëmbim që përfshinte një punonjës të misionit të Bashkimit Sovjetik në OKB, i cili ishte kapur nga FBI me akuza të ngjashme për spiunazh./Euronews

Përgatiti: Nuhi Shala