Dalje rekorde e votuesve në rundin e dytë të zgjedhjeve në Francë

59.71 për qind e votuesve kanë votuar deri në orën 5 të pasdites më 07.07.2024 në rundin e dytë të zgjedhjeve në Francë, një shifër më e lartë krahasuar me rundin e parë së dielës së kaluar, në të cilin edhe ashtu u raportua për dalje masive në procesin zgjedhor, raporton gazeta franceze “Le Monde” në gjuhën angleze.

Zgjedhjet e parakohshme parlamentare u shpallën nga presidenti Emmanuel Macron pasi e djathta ekstreme shënoi sukses të theksuar në zgjedhjet për Parlamentin Evropian.

Kjo është dalja më e madhe e votuesve në zgjedhje në raundin e dytë krahasuar me vitin 1981.

Të dhënat e fundit konfirmojnë rëndësisnë e këtyre palë zgjedhjeve, ku partia e së djathtës ekstreme, Tubimi Kombëtar (RN) i Marine Le Penit, pritet të fitojë shumicën e mandateve në Asamblenë e Francës. Presidenti Macron i shpalli zgjedhjet e parakohshme pas suksesit të RN-së në zgjedhjet evropiane të qershorit, por duket se vendimi do t’i kthehet bumerang, vlerëson gazeta “Le Monde”, duke iu referuar edhe të dhënave të agjencisë së lajmeve, AFP.

Por Le Peni mund të mos e fitojë shumicën e nevojshme për ta detyruar Macronin që ta emërojë zëvendësin e saj, liderin e partisë RN, Jordan Bardellan 28-vjeçar, si kryeministër vetëm pak javë para se Parisi t’i mbajë Lojërat Olimpike.

Një legjislaturë me përfaqësim të theksuar të euroskeptikëve dhe antiemigrantëve do ta dobësonte pozicionin ndërkombëtar të Francës dhe do të kërcënonte unitetin perëndimor kundrejt agresionit rus të Ukrainës, raporton gazeta franceze.

Zyrtarë të lartë të Bashkimit Europian, të cilët tashmë po mësohen të arrijnë marrëveshje me partitë e së djathtës ekstreme në pushtet në Itali dhe Holandë, po i shikojnë zgjedhjet në Francë me sytë katër. Papa Françesku ka zgjedhur ditën e zgjedhjeve franceze për të paralajmëruar kundër “joshjeve ideologjike dhe populistëve”, duke shtuar se “demokracia nuk është në duar të shëndoshë sot në botë”./ Le Monde

Përgatiti: Rexhep Maloku/ KALLXO.com