10-shja e LVV-së, ngritja e Faton Pecit dhe Hekuran Muratit në krahasim me vitin 2021

Figurat e Lëvizjes Vetëvendosje (LVV) dhe Listës Guxo të cilët mbajtën pozitat kyçe në mandatin e Qeverisë Kurti II: Albin Kurti, Glauk Konjufca, Faton Peci, Hekuran Murati, Albulena Haxhiu, Xhelal Sveçla, Donika Gërvalla-Schwarz dhe Arben Vitia janë njerëzit më të votuar në Zgjedhjet e 9 shkurtit 2025. Kjo tetëshe, bashkë me Avni Deharin i cili mbajti pozitën e Deputetit dhe Mimoza Kusari-Lila e cila ishte Shefe e Grupit Parlamentar, përbëjnë dhjetëshen më të votuar deri më tani brenda LVV-së.

Gjashtë nga kjo dhjetëshe mbajtën pozitën e Ministrave në Qeverinë Kurti.

Në bazë të listës të 19 shkurtit 2025, që ka siguruar nga KALLXO.com nga burime të besueshme brenda LVV-së, Kurti ka grumbulluar 294,080 vota, Konjufca 190,980 vota, ndërkaq i treti është ministri i Bujqësisë, Faton Peci me 93,332 vota. 

Personi i katërt më i votuar është renditur ministri i Financave, Hekuran Murati me 90,564 vota, e pesta më e votuara është ministrja e Drejtësisë, Albulena Haxhiu me 85,632 vota, i gjashti është ministri i Punëve të Brendshme, Xhelal Sveçla me 82,043 vota dhe e shtata renditet ministrja e Punëve të Jashtme, Donika Gërvalla-Schwarz me 76,052 vota.

I teti me radhë me numrin më të madh të votave është renditur Avni Dehari, me 65,822 vota. Menjëherë pas tij është shefja e Grupit Parlamentar të LVV-së, Mimoza Kusari Lila me 58,480 vota. I dhjeti me numrin më të madh të votave është ministri i Shëndetësisë, Arben Vitia me 46,396 vota.

Kjo listë nuk është përfundimtarja. Në Pejë, Podujevë, Prishtinë, Ferizaj, Prizren, Leposaviq dhe Zveçan kanë mbetur edhe disa vendvotime pa u numëruar. Komisioni Qendror i Zgjedhjeve (KQZ) ka njoftuar se deri më 19.01.2025 janë numëruar 92.73% e vendvotimeve.

Në bazë të grafikës së KQZ-së, në Pejë, nga 132 vendvotime deri tani janë numëruar 75 sosh; në Prishtinë janë numëruar 187 nga 258, në Podujevë 99 nga 110, në Prizren 218 nga 236, në Ferizaj 142 nga 152, 12 nga 26 në Leposaviq dhe 8 nga 11 në Zveçan. Në Komunat e tjera kanë përfunduar numërimet.

Në një krahasim me rezultatet përfundimtare të Zgjedhjeve të kaluara të vitit 2021, personi i cili ka arritur të ngritet më së larti me numrin e votave është Faton Peci. Në Zgjedhjet e kaluara ai kishte grumbulluar 25,284 vota, apo i 12-ti për nga numri i votave.

Në dhjetëshen e parë të vitit 2021 të renditur sipas numrit të votave kanë qenë Vjosa Osmani, Glauk Konjufca, Arben Vitia, Donika Gërvalla-Schwarz, Vasfije Krasniqi, Mimoza Kusari-Lila, Avni Dehari, Armend Muja, Hekuran Murati dhe Haxhi Avdyli.

Konjufca është i vetmi i cili ka ruajtur vendin e dytë njësoj si në Zgjedhjet e kaluara, edhe pse me rënie të votuesve për më shumë se 10,000. Në vitin 2021 ai kishte grumbulluar 200,646 vota.

Me numrin e votave dhe në renditje është rritur edhe Hekuran Murati, i cili në vitin 2021 ishte i nënti me më së shumti vota, apo 41,172, ndërsa në vitin 2025 i katërti me 90,564 vota.

Në anën tjetër, Gërvalla-Schwarz e cila në vitin 2021 ka qenë e katërta me 71,722 vota, tash është e shtata. Megjithatë, ajo ka fituar mbi 7,000 vota më shumë se herën e kaluar.

Rënie të votave ka shënuar Arben Vitia, i cili në vitin 2021 ishte i treti me numrin më të madh të votave, apo me gjithsej 107,858 vota, ndërsa tash është i 10-ti.

Ndryshe prej herës së kaluar, jashtë dhjetëshes kanë mbetur Haxhi Avdyli dhe Armend Muja.

Komisioni Qendror i Zgjedhjeve ka procesuar në faqen zyrtare të dhënat e rezultateve të 100% të vendvotimeve të Zgjedhjeve të 9 shkurtit 2025, apo 2,533 nga 2,533.

Në bazë të rezultateve të fundit preliminare të përditësuara në orën 09:46, më 20.02.2025, në uebfaqen e KQZ-së, Lëvizja Vetëvendosje (LVV) është e para me 40.80%, apo 342,281 vota.

Partia e dytë me më së shumti vota është Partia Demokratike e Kosovës (PDK) me 22.03% të votave, apo 184,811 vota.

E treta është renditur Lidhja Demokratike e Kosovës (LDK) me 17.63%, apo 147,888 vota.

Koalicioni i Aleancës për Ardhmërinë e Kosovës (AAK) me Nismën, Demokratët, Intelektualët dhe Listën Ideal kanë marrë 7.46% të votave, apo 62,588 vota.

Lista Serbe është partia e pestë me 4.61%, apo 18,942 vota.

Më 09.02.2025, Kosova mbajti Zgjedhjet e rregullta parlamentare.

Sipas KQZ-së, rezultatet preliminare nuk përfshijnë: votat me kusht, votat e personave me nevoja të veçanta dhe votat jashtë Kosovës.

Këto janë Zgjedhjet e para të rregullta që Kosova i ka mbajtur që nga shpallja e pavarësisë, më 2008.