Lushaku: Plani Zhvillimor i Prishtinës, kushtetutë e kryeqytetit

Zëdhënësi i Komunës së Prishtinës, Donat Lushaku ka deklaruar se Ministria e Mjedisit, Planifikimit Hapësinor dhe Infrastrukturës (MMPHI) dërgoi komente për planin zhvillimor të kryeqytetit për vitet 2023-2031, pasi kishin kaluar afatet ligjore.

Ai në emisionin “Kallxo Përnime” theksoi se nuk është e drejtë që opozita të kushtëzojë vënien e planit në diskutim publik me adresim të komenteve të ministrisë.

“Komentet e MMPHI janë 28 të tilla dhe janë pas afatit ligjor, nuk është kushtëzim i drejtë nga ana e LVV në Prishtinë që fillimisht të adresohen komentet, pasi ky është njëherë vetëm për vënie në diskutim publik”- tha Lushaku.

Derisa, lidhur me komentet e shefit të asamblistëve të LVV, Gëzim Sveçla se në plan u zgjerua zona ndërtimore, ai theksoi se “Nuk është profesionale të thuhet se ka zgjerim të zonës ndërtimore për diçka të papërcaktuar as nga ministria.”

Lushaku theksoi se Plani Zhvillimor është dokumenti më i rëndësishëm për qytetin dhe strategjitë për sekore të ndryshme.

“Plani zhvillimor komunal është dokumenti më i rëndësishëm i kryeqytetit që parasheh disa objektiva strategjike, është një lloj kushtetute e kryeqytetit, dallim esencial është edhe puna e banorëve të Prishtinës pasi plani është i paraparë për rreth 300 mijë banorë. Prishtina është pa plan zhvillimor nga viti 2021”- theksoi Lushaku.

Ai madje shtoi se pasi ministria në drejtim të Liburn Aliut në planin e ish-kryetarit Shpend Ahmeti kishte lëshuar pëlqim mjedisor.

“Pas vendimit të ish-kryetarit Shpend Ahmeti është dashur të merret një pëlqim mjedisor nga Ministria e Mjedisit, Planifikimit Hapësinor dhe Infrastrukturës që është lëshuar nga ministri Liburn Aliu në shtator 2021, por plani nuk ka kaluar në Kuvendin Komunal”- shtoi Lushaku.

Kuvendi i Komunës së Prishtinës në dy seanca ka dështuar të votojë për vënie në diskutim publik Planin Zhvillimor për kryeqytetin 2023-2031 në mungesë të votave pasi partitë opozitare LVV dhe PDK po deklarojnë se MMPHI ka gjetur shumë shkelje dhe mangësi të procedurave të ndjekura.

Ky plan fillimisht ishte tentuar të vihej në diskutim publik nga ish-kryetari i Prishtinës, Shpend Ahmeti në vitin 2021, por edhe atëherë nuk ishte votuar pasi asambleja nuk lejoi që në fund të mandatit të votonin një plan që do i mbetej kryetarit të ardhshëm.