Si është të jesh futbollist dhe gjyqtar, tregojnë Patriot Fazliu e Fidan Kqiku
Patriot Fazliu dhe Fidan Kqiku janë futbollistë të KF Kika, që bën gara në Ligën e Dytë të Kosovës.
Përveç që janë bashkëlojtarë, ata kanë edhe një të përbashkët tjetër.
Të dy janë gjyqtarë të futbollit, të licencuar nga Federata e Futbollit të Kosovës.
Patriot Fazliu luan në pozitën e qendërmbrojtësit. Në moshën 16 vjeçare kishte debutuar te klubi tij i vendlindjes KF Kaolini nga Kamenica, pastaj do të transferohet te KF Bashkimi, klub nga i njëjti qytet që ka bërë gara në Ligën e Parë për dy vite radhazi.
Edhe bashkëlojtari i Patriotit, Fidan Kqiku, për futbollin u interesua nga fëmijëria. Fillimisht u angazhua te shkolla e futbollit “Arbëria”, pastaj te klubi Gjilani, për të cilin ka luajtur një vit, në ekipin e parë.
Ndërsa, 24 vjeçari Patriot Fazliu tregon për futbollistin më të mirë me të cilin është përballur. Me këtë rast përmend Mentor Mazrekajn. Ndërsa, lojtarin më ‘fair play’ e konsideron kapitenin e Gjilanit, Ylber Kastrati.
Sa i përket punës së gjyqtarit, ai thotë se inspirohet nga gjyqtari i njohur holandez, Bjorn Kuipers, dhe shpreson që një ditë t’i arrijë sukseset e tij.
“Unë e shikoj me shumë kënaqësi gjyqtarin holandez Bjorn Kuipers, se si e menaxhon një lojë, autoriteti i tij në fushë e shumë gjëra tjera, të cilat e bëjnë gjyqtar të kompletuar”, tregon në një bisedë për KALLXO.com Patriot Fazliu.
Fazliu tregon se atë dhe Fidanin i ka shtyrë të merren me referim ish- trajneri i tyre te KF Bashkimi, Skender Hoxha, e i cili tani është kryetar i Gjyqtarëve të Regjionit të Gjilanit.
“Rrugën e referimit e kemi pasur pasion, qysh më herët, por për ta finalizu këtë rrugë, ishte trajneri Skender Hoxha, për të cilin jemi falënderues”, tregon Patriot Fazliu.
Numri 5 i KF Kika tregon se kur është nën petkun e gjyqtarit, mundohet t’i kursejë futbollistët, pasi edhe vetë e di se çfarë do të thotë ndëshkimi. Por, kur ka duele të ashpra e fjalosje ai thotë se nuk i fal futbollistët.
“Pasi jam vet futbollist mundohem sado pak me i kursy, sidomos në duele, por për fjalosje, protesta, nervozizëm nuk i toleroj”, thekson Fazliu.
Kurse Fidan Kqiku, i cili vjen nga Gjilani, thotë se futbollsti më i mirë që është përballur është Enis Zabërgja.
“Lojtari më i mirë me të cilin jam përballur është Enis Zabërgja, kurse lojtari më i mirë të cilit i kam referuar është Mentor Zhdrella, lojtari më ‘fair play’ është Ylber Kastrati i Gjilanit”, thotë Kqiku.
Për 23 vjeçarin referi i preferuar është gjermani Felix Brych.
“Felix Brych për mua është pikë reference që ta vazhdoj karrierën e referimit, atë e përcjell pothuajse në çdo lojë që e ndan drejtësinë dhe mundohem t’i përfitoj gjanat e mira prej tij”, tregon Fidan Kqiku për KALLXO.com.
Arsyeja pse ka zgjedhur referimi, Kqiku thotë se kështu dëshiron të qëndrojë më afër futbollit.
“Unë me topin e futbollit jam prej fëmijërisë dhe mendoj që mos t’i ndahem deri sa të kam fuqi, e që të qëndroj afër lojës më të bukur në botë që është futbolli ka qenë mënyra që të bëhem edhe gjyqtar”, thotë ai.
Patriot Fazliu thotë se referimi në futbollin e Kosovës është duke marrë hapa pozitivë falë kryetarit të gjyqtarëve Përparim Hasanit dhe kryetarit të Lidhjes rajonale të Gjilanit, Malazog Hoxha.
“Cilësia e referimit në Kosovë është rritur mjaft shumë në vitet e fundit, e për këtë meritorë janë Përparim Hasani, Kryetari i Shoqatës së Gjyqtarëve dhe Malazog Hoxha, kryetar i Lidhjes rajonale të Gjilanit dhe kryetar i komisionit për delegim”, thotë Fazliu.
Fidan Kqiku tregon se nuk është e lehtë që të jetë edhe futbollist edhe gjyqtar i futbollit.
“Është e vështirë, të shtunën jemi gjyqtarë, të dielën futbollistë, kurse ditëve tjera gjithmonë me stërvitje, por me pasion dhe vullnet ia dalim mbanë”, tregon Kqiku.
Patriot Fazliu thotë se për vitin 2020, synim e kanë inkuadrimin në Ligën e Parë, me skuadrën e KF Kikës, të cilët janë kampion vjeshtor në Ligën e Dytë.
“Synimi kryesor është që të inkuadrohemi në Ligën e Parë me KF Kikën, klub në të cilin presidenti i klubit Naim Biqkaj së bashku me kryesinë kanë bërë punë të palodhshme. Po ashtu i falënderojmë edhe tifozët ‘Luanët’ për mbështetjen e dhënë”, thekson Patriot Fazliu për KALLXO.com.