Sondazhi i CNN: Shumica e amerikanëve duan që SHBA të bëjë më shumë për ta ndalur Rusinë

Amerikanët në masë dërrmuese e favorizojnë rritjen e sanksioneve ekonomike kundër Rusisë dhe i mbështesin gjerësisht veprimet e mëtejshme për ta ndaluar pushtimin e Rusisë në Ukrainë, por shumica e kundërshtojnë veprimin e drejtpërdrejtë ushtarak të SHBA-së, sipas një sondazhi të ri të CNN të kryer nga SSRS (SSRS është një firmë studimi dhe kërkimi tregu me shërbim të plotë).

Tetëdhjetë e tre për qind e amerikanëve thanë se favorizonin rritjen e sanksioneve ekonomike kundër Rusisë në përgjigje të pushtimit, me vetëm 17 për qind kundër.

Sanksionet e reja dhe kufizimet ekonomike që e targetojnë Rusinë u njoftuan nga SHBA dhe vende të tjera ndërsa sondazhi u zhvillua në terren të premten dhe të shtunën.

Mbështetja për rritjen e sanksioneve në sondazhin e ri qëndron shumë mbi 67% që favorizuan të njëjtën gjë në vitin 2014 në mes të inkursionit të Rusisë në Ukrainën lindore dhe aneksimit të Krimesë.

Një shumicë më e vogël, 62%, gjithashtu donte të shihte SHBA-në të bënte më shumë për ta ndaluar intervenimin ushtarak rus në Ukrainë, me 38% që thonë se SHBA ka bërë tashmë mjaftueshëm.

Por publiku është kundër veprimit të drejtpërdrejtë ushtarak nga SHBA: vetëm 42% ishin në favor të një hapi të tillë nëse sanksionet nuk funksionojnë, me 58% kundër.

Midis atyre që thanë se SHBA duhet të bëjë më shumë për ta ndaluar inkursionin ushtarak të Rusisë, megjithatë, 58% ishin në favor të përdorimit të veprimeve ushtarake nëse sanksionet dështonin.

Ka pak shenja që publiku po mobilizohet rreth reagimit të Presidentit Joe Biden ndaj krizës, pavarësisht nga mbështetja e gjerë për llojin e sanksioneve që ka vendosur administrata e tij.

Vetëm 42% thanë se i besojnë Bidenit të paktën në mënyrë të moderuar për t’i marrë vendimet e duhura në lidhje me situatën në Ukrainë, pothuajse në të njëjtin nivel me vlerësimin e tij të përgjithshëm të miratimit në sondazhet e fundit. Këto rezultate, si shumica e numrave të Bidenit, janë thellësisht të polarizuara, me 84% të demokratëve, por vetëm 9% të republikanëve thonë se i besojnë vendimmarrjes së tij të paktën në mënyrë të moderuar./CNN