Pretendimet e Selim Behramajt se Komuna e Skenderajt ia rrënoi shtëpinë dhe ia mori pronën, Gjykata merr një vendim

Në lidhje me pretendimet e qytetarit nga Skenderaj, Selim Behramaj, se Komuna e Skenderajt ia ka rrënuar shtëpinë e tij dhe ia ka marrë pronën, Gjykata e Mitrovicës ka marrë vendimin më 26.09.2024 që të caktohet ekpertizë gjeodezike dhe që gjykata të dalë në vendin e ngjarjes.

Gjyqtari i rastit, Fuad Haliti, ka bërë të ditur se këqyrja në vend të ngjarjes do të bëhet më 18.10.2024.

“Caktohet ekspertiza gjeodezike dhe dalja në vendkëqyrje e gjykatës. Eksperti dhe detyrat e tij caktohen me aktvendim të veçantë. Obligohet paditësi që të bëjë deponimin e mjeteve financiare për pagesën e ekspertizës gjeodezike në shumën prej 200 euro në llogarinë bankare të KGJK-së, në afat prej shtatë ditësh, në të kundërtën Gjykata do të shfuqizojë aktvendimin me të cilin u caktua marrja e provës me ekspert gjeodet dhe vendkëqyrja e gjykatës”- thuhet në aktvendim.

Ndërsa qytetari në cilësinë e paditësit, Selim Behramaj, ka deklaruar para Gjykatës sot më 26.09.2024 se prona ka qenë e tij, e ndarë nga i ashtuquajturi “Këshilli i Punëtorëve” dhe këtu ka jetuar deri në mars të vitit 2024.

“Unë aty jam vendosur me rekomandimin e “Këshillit të Punëtorëve” dhe drejtorit të firmës sepse aty janë ndarë dy banesa në vitin 1981-82, kurse unë kam qenë i pari në listën për banesë. Mirëpo një banesë ka qenë e vogël për mua, nuk më ka konvenu kurse banesa e dytë ka qenë më e madhe mirëpo aty ka qenë një punëtore malazeze dhe ka pasur përparësi. Kurse mua më është thënë që të vendosem në objektin e pompave, unë jam vendosur në objektin e pompave që nga viti 1982 deri në vitin 1987 kurse në vitin 1986 “Këshilli i Punëtorëve” ka vendosur që mua të më ndahet pllaci aty dhe ta ndërtoj shtëpinë. Në muajin e gjashtë kam filluar ta ndërtoj shtëpinë ndërsa në vitin 1987 e kam përfunduar shtëpinë dhe aty kam banuar deri në mars 2024”- tha Behramaj.

Si të padrejtë vendimin e Komunës karshi klientit të tij e cilëson avokati i paditësit, Qëndrim Rama, i cili thekson se Komuna e Skenderajt ka bërë veprim arbitrar.

“A është marrë ndonjë veprim nga organet e të paditurës që të pengohet ndërtimi i objektit familjar të paditësit? A i është dhënë afat për rrënimin e objektit dhe a janë sjellë si shtëpiakë të mirë… ashtu që dëmi të ishte më i vogël ku ne theksojmë për këto pretendime se e paditura gjatë gjithë procedurës do të dështojë të sigurojë këto vendime pasi që ne konsiderojmë që e paditura në mënyrë arbitrare pa e respektuar asnjë normë pozitive në momentin e rrënimit, e njëjta në mënyrë të njëanshme ka rrënuar objektin familjar duke i shkaktuar dëm dhe duke penguar paditësin në të drejtën e tij të fituar me anë të ndërtimit siç e kemi potencuar në seancën paraprake”- u shpreh avokati.

Në seancën gjyqësore e cila u mbajt më 26.09.2024 e pranishme nuk ishte e paditura – Komuna e Skenderajt.

Gjyqtari Fuad Haliti tha se Komuna e ka njoftuar Gjykatën se nuk mund të jenë në seancë dhe se qëndrojnë pranë përgjigjes në padi.

“Komuna e Skenderajt, askush dhe e njëjta përmes e-mailit të datës 20.09.2024 ka njoftuar Gjykatën se nuk mund të jenë të pranishëm në këtë seancë dhe i propozojnë Gjykatës që seanca të mbahet në mungesë të tyre dhe se të njëjtit qëndrojnë pranë përgjigjes në padi”- tha gjyqtari në fillim të seancës.

Ndryshe, KALLXO.com ka raportuar më 05.03.2024 për përplasjen për pronë mes qytetarit nga Skenderaj dhe Komunës.

“Vendi është i jemi, që 50 vjet jetoj qitu. Në luftë m’u ka kallë shpia, pas lufte e kam maru apet”- kishte thënë plot emocione qytetari Selim Behramaj.

KALLXO.com kishte sjellë pamje nga vendi i ngjarjes ku shihej se Komuna e Skenderajt po ia rrënonte shtëpinë qytetarit.