![](https://kallxo.com/wp-content/uploads/2020/08/Statistikat-e-vdekjeve-me-COVID-19-Kosove-fotoMSH-720x480.jpg)
Ministria e Shëndetësisë konteston të dhënat e Bloomberg për vdekjet në Kosovë nga COVID-19
Ministria e Shëndetësisë i është kundërpërgjigjur medias amerikane ‘Bloomberg’ pasi kjo e fundit gjatë ditës së sotme ka publikuar statistika ku Kosovën e ka radhitur të parën për nga numri i vdekjeve në botë në 1 milion banorë si pasojë e pandemisë së COVID-19.
Zëdhënësi i Ministrisë së Shëndetësisë, Faik Hoti, në një reagim në Facebook konstatoi se numri i të vdekurve në Kosovë në 1 milion banorë ka qenë 37.7 jo 54.2 siç paraqitet në statistikat e ‘Bloomberg’.
“Nëse këto të dhëna i kthejmë në raport me 1 milionë banorë, i bie që gjatë kësaj periudhe (20-26 gusht) numri i të vdekurve në 1 milionë banorë ka qenë 37.5. Jo 54.2. As lapsi i thjeshtë s’po e qet ashtu”, ka shkruar Hoti në Facebook.
Ai ka thënë se nga data 20 deri më 26 gusht në Kosovë kanë vdekur 67 persona të prekur me COVID-19.
“Sipas datave si në vijim: më 20 gusht 13, 21 gusht-10, 22 gusht-9, 23 gusht-10, 24 gusht-13, 25 gusht-8 dhe 26 gusht -4. Numri i banorëve të Kosovës është 1.782.115”, thuhet në reagim.
Bloomberg ka raportuar për vdekjet nga COVID-19 nëpër botë ku Kosovën e ka radhitur të parën për nga numri i lartë i vdekjeve duke u bazuar në numrin e banorëve.
Deri sot në Kosovë kanë vdekur 499 persona si pasojë e infeksionit me COVID-19.
Bloomberg: Kosova, e para për nga vdekjet në 1 milion banorë nga COVID-19