Komuna e Drenasit hap konkurs për 27 punëtorë

Komuna e Drenasit ka hapur konkurs për 27 pozita nëpërmjet marrëveshjeve për shërbime të veçanta.

Kjo komunë po planifikon të punësojë 20 zyrtarë të dikastereve të ndryshëm, katër inspektorë, fotografë, rojtarë pylli e arkëtarë.

Vlera e parashikuar e këtyre kontratave është 59 mijë e 700 euro.

Kohëzgjatja e kontratave do të jetë në kohëzgjatje prej 6 muajve.

Procedurat po zhvillohen përmes platformës elektronike “e-prokurimi“.

Kjo është lista e plotë e pozitave:

Inspektor i Mjedisit për Drejtorinë e Inspeksionit
2 Inspektorë sanitar për Drejtorinë e Inspeksionit
2 Zyrtarë për Sport për Drejtorinë e Kulturës
Zyrtar Administrativ për Drejtorinë e Kulturës
2 Zyrtarë të Shërbimeve Sociale për Qendrën për punë sociale
Zyrtar Ligjor për Zyrën e Kryetarit
Fotograf
Zyrtar për Transport Rrugor
Zyrtar për futjen e të dhënave për Drejtorinë e Zhvillimit Ekonomik
Zyrtar i Depos 1 për DKA
Zyrtar i prokurimit 1 për Administratë të Përgjithshme
Zyrtar i prokurimit 2 për Administratë të Përgjithshme
2 Zyrtar Administrativë për Administratën e Përgjithshme
Zyrtar për Mbrojtje të Mjedisit për drejtorinë e Urbanizmit dhe Mbrojtjes së Mjedisit
Zyrtar Ligjor Për drejtorinë e Urbanizmit dhe Mbrojtjes së Mjedisit
2 Zyrtarë për Bujqësi
Arkëtarë për Drejtorinë e Bujqësisë
Roje Pylli
Zyrtar Ligjor Pronësor për drejtorinë e Gjeodezisë, Kadastër dhe Pronë
Zyrtar për çështje pronësore për drejtorinë e Gjeodezisë, Kadastër dhe Pronë
Zyrtar Administrativ Kadastral për drejtorinë e Gjeodezisë, Kadastër dhe Pronë
Zyrtar Ligjor për Drejtorinë e Infrastrukturës Publike

Që nga 30 qershori kur ka hyrë në fuqi Ligji për Zyrtarët Publikë, institucionet publike dhe komunat e Kosovës do të bëjnë rekrutimin e stafit për shërbime të veçanta duke u bazuar në këtë ligj.

Institucionet dhe komunat e Kosovës deri në muajin qershor punësimin e punonjësve me marrëveshje të veçanta që ndryshe njihen si kontrata mbi vepër e kanë bërë në bazë të Ligjit për Shërbimin Civil.

Por që nga fillimi i muajit korrik rekrutimi i punëtorëve për shërbime të veçanta do të bëhet duke u bazuar në nenin 84 për Marrëveshjet për shërbime të veçanta të Ligjit për Zyrtarë Publik.

Pas hyrjes në fuqi të ligji të ri, Komisioni Rregullativ i Prokurimit Publik ka hartuar rregullat për prokurim të shërbimeve të veçanta përmes të cilës edhe do të bëhet punësimi.

Rregullat e hartuara nga KRPP aplikohen vetëm për prokurimin e Shërbimeve të veçanta të cilat nuk mund të sigurohen përmes procedurave të rekrutimit sipas Ligjit për Zyrtarët Publikë.

Shërbimet e veçanta të cilat nuk mund të sigurohen përmes procedurave të rekrutimit janë shërbime profesionale për të cilat Autoriteti Kontraktues ka nevojë por që nuk i plotëson kërkesat me stafin që e ka.

Ndryshe nga Ligji për Shërbimin Civil, i cili ka lejuar që punësimi me marrëveshje për shërbime të veçanta apo kontrata mbi vepër të bëhej jo më gjatë se 6 muaj, me Ligjin për Zyrtarë Publikë, kohëzgjatja e kontratave do të jetë deri në 36 muaj.

Procedura për rekrutim të stafit për shërbime të veçanta fillon me publikimin e njoftimit për kontratë në platformën elektronike, të përgatitur në përputhje me nenin 40-të të Ligjit të Prokurimit Publik dhe me ngarkimin e Dosjes së tenderit të miratuar nga KRPP.