Koalicioni VV-LDK në sytë e mediave botërore
Mediat e ndryshme botërore kanë raportuar për marrëveshjen për bashkëqeverisjeje ne mes të Lëvizjes Vetëvendosje dhe Lidhjes Demokratike të Kosovës, që u finalizua mëngjesin e sotëm.
“Partitë kosovare nënshkruajnë marrëveshjen e shumëpritur për formimin e qeverisë”, kështu e ka filluar lajmin gazeta britanike “The Guardian”, e cila më tutje shkroi se dy nga partitë më të mëdha kanë arritur një marrëveshje të dielën për krijimin e një qeverie të re pas gati katër muajsh pas zgjedhjeve.
Në shkrimin e gazetës citohet edhe një fjalim i Albin Kurtit dhënë për mediat “Ne kemi arritur marrëveshjen”.
Tutje “The Guardian” ka bërë edhe një profil të historikut të Kosovës që nga shpallja e pavarësisë e deri tek negociatat e lëna gjysmë më Serbinë që konsiderohen si shumë sfiduese.
Edhe agjencia e lajmeve “Reuters” po ashtu e filloi lajmin me titullin “Partitë kosovare arrijnë marrëveshjen e shumë pritur për formim të qeverisë”, duke përmendur edhe zgjatjen e këtij procesi si dhe sfidat që po e presin qeverinë e ardhshme, sidomos në dialogun me Serbinë.
“Yahoo” gjithashtu ka raportuar për marrëveshjen, duke i kushtuar vëmendje edhe një profili të shkurtër të Albin Kurtit.
“Albin Kurti, 44 vjeçari i majtë i Lëvizjes Vetëvendosje tha se do bëhet kryeministri i ardhshëm pas marrëveshjes me partinë e qendrës së djathtë, Lidhjen Demokratike të Kosovës dhe grupeve të tjera”, shkruan “Yahoo.”
Media gjermane, “Deutsche Welle” gjithashtu i ka kushtuar një artikull zhvillimeve në Kosovë, përkatësisht koalicionit VV-LDK.
“Dy nga partitë e më të mëdha në Kosovë, e majta Lëvizja Vetëvendosje dhe e Lidhja Demokratike e Kosovës e qendrës së djathtë, kanë arritur një marrëveshje. Koalicioni i ri do përbëhet edhe nga gjashtë grupe minoritare boshnjakë, serbë, turq dhe grupe tjera”, shkruan Dutsche Welle.
“The Telegram” po ashtu i kushtoi një artikull arritjes së marrëveshjes si dhe vonesës që e kishte përshkuar gjithë këtë proces, duke i kushtuar vëmendje punëve që po e presin këtë qeveri edhe në raport me Serbinë, e cila refuzon njohjen e Kosovës.
“Një nga sfidat që po e pret këtë qeveri janë negociatat me shtetin fqinj Serbinë, e cila edhe më tutje refuzon ta njohë si shtet të pavarur [Kosovën],” thuhet në shkrim.
“Al Jazeera Balkans” gjithashtu raportoi për arritjen e marrëveshjes mes dy partive politike të cilat do qeverisin bashkë përshirë edhe me grupet minoritare.
“Marrëveshja është arritur një ditë para afatit që është caktuar për zgjedhjen e kryeministrit të ri”, shkruan Al Jazeera Balkans.
