Drejt fundit, numërohen 97.55% e votave për kandidatët për deputetë

Më pak se 3% e votave të kandidatëve për deputetë kanë mbetur për t’u numëruar deri në përmbyllje të procesit.

Komisioni Qendror i Zgjedhjeve (KQZ) ka bërë të ditur se deri më 20.02.2025 janë numëruar 97.55% e vendvotimeve, apo 2,471 nga 2,533. 

“Procesi i numërimit ka përfunduar në 35 Komuna, ndërkaq është duke vazhduar në Qendrat Komunale të Numërimit në 3 Komunat e tjera: Leposaviq, Pejë, Prishtinë.” – njoftoi KQZ, më 21.02.2025.

Në bazë të tabelës së publikuar nga KQZ-ja, Komunat në të cilat po vazhdon numërimi i votave janë: Prishtina, Leposaviqi dhe Peja.

Tri kuti kanë mbetur pa u përfunduar në Leposaviq nga gjithsej 26; 28 në Pejë, nga gjithsej 132 dhe 31 në Prishtinë, nga gjithsej 258.

Më 20.02.2025, KQZ-ja filloi t’i publikojë votat e kandidatëve për deputetë në versionin online në uebfaqe. Në anën tjetër ka përfunduar 100% procesimi i rezultateve preliminare për subjektet politike.

Sipas rezultateve të KQZ-së deri në ora 16:34, kandidati për Kryeministër nga radhët e Lëvizjes Vetëvendosje, Albin Kurti ka marrë 266,798 vota.

Kandidati për Kryeministër nga Partia Demokratike e Kosovës, Bedri Hamza deri më tani është votuar nga 153,789 qytetarë.

Për Lumir Abdixhikun, kandidat për Kryeministër nga radhët e Lidhjes Demokratike të Kosovës, që njëherit është edhe Kryetar i këtij subjekti, votuan 112,474 qytetarë.

E, Ramush Haradinaj, lider i Aleancës për Ardhmërinë e Kosovës dhe kandidat për Kryeministër, sipas rezultateve aktuale, ka 38,346 vota.

Kurse, Memli Krasniqi, lider i Partisë Demokratike të Kosovës, i cili në listë ishte numri 2, mori 87,288 vota.

Në bazë të rezultateve të fundit preliminare të përditësuara në orën 16:34, më 20.02.2025, në uebfaqen e KQZ-së, për subjektet politike, Lëvizja Vetëvendosje (LVV) është e para me 40.97%, apo 317,149 vota.

Partia e dytë me më së shumti vota është Partia Demokratike e Kosovës (PDK) me 22.47%, apo 173,894 vota. Për dallim nga rezultatet e mëparshme preliminare, PDK ka shënuar rritje në përqindje, por rënie në numrin e votave (22.04%, 184,811 vota).

E treta është renditur Lidhja Demokratike e Kosovës (LDK) me 17.14%, apo 132,671 vota. Edhe LDK ka shënuar rritje në përqindje, por rënie në numrin e votave (17.63%, 147,888 vota).

Koalicioni i Aleancës për Ardhmërinë e Kosovës (AAK) me Nismën Socialdemokrate, Intelektualët dhe Listën Ideal ka marrë 7.44% të votave, apo 57,549 vota. Për dallim nga rezultatet e mëparshme preliminare, ky Koalicion ka shënuar rritje në përqindje, por rënie në numrin e votave (7.46%, 62,588 vota).

Këto janë Zgjedhjet e para të rregullta që Kosova i ka mbajtur që nga shpallja e Pavarësisë, më 2008.