Dhoma e Tregtisë dhe Industrisë i kërkon Qeverisë që t'u ndihmojë bizneseve që preken nga taksa e SHBA-së
Dhoma e Tregtisë dhe Industrisë e Kosovës (DHTIK) ka kërkuar nga Qeveria e Kosovës që t’u dalë në ndihmë bizneseve që preken nga taksa e SHBA-së ndaj Kosovës.
Presidenti i Shteteve të Bashkuara, Donald Trump njoftoi të mërkurën, më 02.04.2025, se SHBA-ja do të vendosë një tarifë bazë prej 10% për importet nga të gjitha vendet e botës – përfshirë nga Kosova dhe vendet e tjera të Ballkanit Perëndimor.
Në një komunikatë për media, Dhoma e Tregtisë dhe Industrisë ka thënë se ka pritur me shqetësim Vendimin e Presidentit amerikan.
Sipas tyre, Vendimi pritet të “godasë” edhe më shumë eksportin.
“Sipas të dhënave të Agjencisë së Statistikave të Kosovës, në dhjetor 2024, eksportet tona ishin 3.5%, përderisa në muajin janar dhe shkurt 2025, ato ranë në 2.8, përkatësisht 2.5% në muajin shkurt të këtij viti. Dhoma e Tregtisë dhe Industrisë Kosovë ka kohë që ka alarmuar për një Vendim të tillë dhe ka kërkuar nga institucionet që të shfrytëzojnë kanalet diplomatike për të mos ndodhur ky Vendim. Gjithashtu, DHTIK i bënë thirrje Qeverisë që t’u dalë në ndihmë bizneseve që atakohen nga ky Vendim.” – thuhet në reagim.
Sipas Vendimit të presidenit amerikan Donald Trump ndaj mallrave të importuara nga Kosova është vendosur tarifë prej 10%, ndaj atyre nga Shqipëria 10%, Serbia 37%, Bosnja e Hercegovina 35% dhe Maqedonia e Veriut 33%.
Duke folur në Shtëpinë e Bardhë, Trump tha se ndaj importeve nga Kina do vendoset tarifë prej 34%, ndaj atyre nga Bashkimi Evropian 20%, Korea e Jugut 25% dhe Japonia 24%.
Produktet që i eksporton Kosova në SHBA përfshijnë: ushqime, lëngje, tekstil, dyshekë, por dhe prodhime nga druri dhe plastika.
Organizatat ekonomike thonë se nga viti 2019, në fakt, ka nisur edhe rritja e eksporteve të përgjithshme të Kosovës në SHBA, për shkak të rritjes së cilësisë së produkteve.
Këtë e tregojnë edhe të dhënat e Doganës së Kosovës, sipas të cilave vlera e tyre në vitin 2019 ishte tre milionë euro, ndërsa tre vjet më vonë arriti në mbi 131 milionë.
Trump shpall tarifa reciproke ndaj të gjitha vendeve, përfshirë Kosovën
