Tarifat hakmarrëse të Kinës përshkallëzojnë luftën tregtare

Kina ia ka kthyer presidentit amerikan Donald Trump me të njëjtën monedhë.

Të premten në mbrëmje në Pekin – sipas kohës lokale – me një seri njoftimesh të njëpasnjëshme – duke përfshirë edhe një tarifë prej 34%, Kina ka treguar se nuk ka synim që të sprapset prej luftës tregtare me presidentin amerikan Donald Trump, i cili gjatë javës mori Vendimin për një mori tarifash të larta ndaj importeve anembanë botës – raporton gazeta The New York Times.

Ministria kineze e Financave ka bërë të ditur se do t’i kundërvihet planit të Trumpit për tarifën prej 34% ndaj mallrave nga Kina, me një tarifë prej 34% ndaj importeve amerikane në shtetin aziatik.

Ndaras, Ministria e Tregtisë e Kinës ka bërë të ditur se ka shtuar 11 Kompani amerikane në listën e saj të “entiteteve të pabesueshme” – duke ua ndaluar në thelb veprimtarinë biznesore në Kinë ose me Kompanitë kineze. Ministria ka themeluar një Sistem licensimi për kufizimin e importeve të xeheve të rralla natyrore që gërmohen dhe përpunohen pothuajse ekskluzivisht në Kinë dhe përdoren për gjithçka: prej makinave elektrike deri te bombat e avancuara.

Ministria e Tregtisë ka bërë të ditur njashtu se do të nisë dy hetime tregtare të eksporteve amerikane të pajisjeve të avancuara mjekësore – aso që Shtetet e Bashkuara të Amerikës vazhdojnë të jenë në konkurrencë të ashpër me rivalët kinezë.

Administrata e Përgjithshme e Doganave e Kinës ka bërë të ditur se do të ndalojë importet e mishit të pulës nga pesë eksportuesit më të mëdhenj amerikanë të prodhimeve bujqësore.

Dhe, Administrata Shtetërore e Kinës për Rregullimin e Tregut ka bërë të ditur se dyshon se divizioni kinez i Dupontit, gjiganti amerikan i kimikateve, kishte shkelur Ligjin kinez kundër monopolit të Kinës dhe se këtë Kompani do ta hetojë. Kompania amerikane nuk e ka komentuar menjëherë pretendimin kinez.

Tarifat e reja kineze prej 34%, që janë shtesë e tarifave të mëhershme, do të godasin më pak mallra sesa ato të tarifave të presidentit Trump, për shkak se Kina shumë më shumë i shet SHBA-së mallra sesa blen prej saj. Kina ka blerë mallra amerikane në vlerë prej 147.8 miliardë dollarësh vjet. Pekini i ka shitur SHBA-së mallra në vlerë prej 426.9 miliardë dollarësh – duke përfshirë celularë, orendi, lodra dhe shumë produkte të tjera.

Përgatiti: Rexhep Maloku – Kallxo.com