Policia e Shtetit arreston gjashtë të dyshuar pasi përfituan nga ndihmat për të miturit me probleme shëndetësore

Policia e Shtetit ka njoftuar se ka arrestuar gjashtë persona të dyshuar në kuadër të një operacioni i cili është zhvilluar nga Njësia për Hetimin e Krimeve Kibernetike në Departamentin e Policisë Kriminale dhe Komisariati i Policisë Pogradec, në bashkëpunim me Prokurorinë e Rrethit Gjyqësor Pogradec.

Policia e Shtetit ka bërë të ditur se kanë kryer hetime gjithëpërfshirëse në lidhje me verifikimin dhe ndjekjen penale të disa shtetasve, për veprat penale “mashtrimi kompjuterik “dhe “falsifikimi kompjuterik”.

“Pas kryerjes së hetimeve, Njësia për Hetimin e Krimeve Kibernetike, në bashkëpunim me Prokurorinë e Rrethit Gjyqësor Pogradec dhe Komisariatin e Policisë Pogradec, ka ekzekutuar urdhrat e ndalimit ndaj shtetasve, K. L., 23 vjeç, D. D., 29 vjeç, G. R., 41 vjeç, E. M., 37 vjeç, të katërt banues në Pogradec, K. H., 27 vjeç dhe L. K., 39 vjeç, banues në Tiranë. Gjithashtu u shpall në kërkim shtetasi K. C., 23 vjeç, banues në Pogradec”, thuhet në njoftimin e Policisë së Shtetit.

Sipas njoftimit, materiali hetimor i ndjekur nga Njësia për Hetimin e Krimeve Kibernetike kishte të bënte me dyshime të arsyeshme se këta shtetas, në bashkëpunim me njëri-tjetrin, kanë kryer veprime me qëllim ngritjen e një skeme të mashtrimit kompjuterik për përfitimin e shumave të ndryshme monetare nga të gjithë shtetasit shqiptarë ose jo, të cilët kanë qenë të interesuar për të ndihmuar të mitur me probleme shëndetësore.

“Për këtë arsye, këta persona vendosnin në dispozicion të shtetasve të interesuar, llogari bankare apo të dhëna shtetasish të cilët do të ishin përfitues të donacioneve, duke i tërhequr ato në institucione të ndryshme financiare. Tërheqja bëhej nëpërmjet profileve të rrjeteve sociale me të dhëna të rreme, por dhe dhënies së të dhënave të rreme për dërgimin e donacioneve, me qëllim që të mos gjendeshin në rast se organet ligj zbatuese do të viheshin në dijeni të këtij aktiviteti kriminal”, njofton policia.

Në bazë të njoftimit, të dyshuarit për rreth gjashtë muaj, kanë arritur që të marrin qindra transaksione financiare nga shtetas shqiptarë ose jo, të cilët janë me banim në territorin e Shqipërisë, por dhe jashtë saj.

“Në cilësinë e provës materiale u sekuestruan aparate celular, dokumente tërheqjesh monetare, një sasi lënde narkotike e dyshuar si kokainë. Aktualisht po punohet me ritme të shpejta për zbardhjen e plotë të këtij aktiviteti kriminal dhe evidentimin dhe vendosjen përpara drejtësisë edhe të personave të tjerë të implikuar në këtë aktivitet në të gjithë territorin e Republikës së Shqipërisë”, thuhet në njoftim.

Policia e Shtetit ka njoftuar se materialet hetimore rreth këtij rasti i janë dërguar Prokurorisë Pranë Gjykatës së Shkallës së Parë Pogradec, për vazhdimin e veprimeve të mëtejshme hetimore dhe procedurale, për veprat penale “Mashtrimi kompjuterik” dhe “Falsifikimi kompjuterik”.

Duke publikuar adresat dhe numrat e kontaktit, Njësia për Hetimin e Krimeve Kompjuterike u ka bërë thirrje të gjithë shtetasve që kanë dyshime të arsyeshme për funksionimin e skemave të tilla të raportojnë rastet.