Një person sulmohet brenda një kafeterie, arrestohet ish i akuzuari për terrorizëm

Brenda një lokali në Istog, dy persona dyshohet se sulmuan një person tjetër ndërsa arsyet pretendohen se janë për çështje prone.

Mbrëmjen e 2 prillit 2025, Y. B., ishte ulur brenda një kafeterie në Istog ndërsa dy persona N.Raci e L.Musliu kishin hyrë brenda dhe e kishin sulmuar me kondak të armës. Nga kjo ngjarje që nga 2 prilli është arrestuar vetëm L.Musliu ndërsa i dyshuari kryesor për këtë ngjarje N. Raci vazhdon të jetë në arrati.

KALLXO.com mëson se Musliu ka qenë edhe pjesë e grupit që ishte arrestuar dhe dënuar për terrorizëm në vitin 2018, pasi të njëjtit dyshoheshin se kishin bërë plan të sulmonin kombëtaren e Izraelit në futboll.

Në atë kohë Musliu ishte dënuar me 3 vjet e 6 muaj burg, ndërsa i gjithë grupi ishte dënuar me 35,5 vjet burg.

Por në mbrëmjen e 02.04.2025, Musliu dyshohet se ishte bashkë me një person tjetër N.Raci të cilin viktima e ka raportuar në polici për vrasje në tentativë.

Në raportin policor të datës 03.04.2025 thuhet se rreth orës 18:58 një burrë ka raportuar se është sulmuar fizikisht me kondak të armës nga një i dyshuar i cili është larguar në drejtim të panjohur. Me këtë të fundit ishte edhe L. Musliu.

Në bazë të dëshmisë së të dëmtuarit që ka arritur të siguroj KALLXO.com, thuhet se i njëjti deri sa ka qenë brenda hapësirave të një lokali kishin hyrë N.Raci (ende nuk është arrestuar) dhe L. Musliu.

E gjitha kishte nisur siç ka dëshmuar i dëmtuari pasi N.Raci i kishtë thënë viktimës se ‘me ty kam punë se po m’i blen pronat e mia’.

Viktima ishte ngritur në këmbë dhe kishte tentuar të largohet por në atë rast gjithmonë sipas dëshmisë që ka siguruar KALLXO.com, N.Raci kishte nxjerrë armën dhe e kishte kapë për fyti viktimën duke e kërcënuar që do ta vras.

E L.Musliu siç përshkruhet në dëshminë e viktimës e kishte goditur këtë të fundit vazhdimisht në pjesën e kokës, deri sa viktima kishte dëshmuar se ishte kthyer nga tashmë i arrestuari Musliu dhe në ato momente Raci e kishte goditur në kokë me kondak të revoles dhe në ato momente ka dëgjuar se edhe revolja kishte shkrepur.

Viktima kishte thënë se pasi kishte shkrepur arma ndonëse nuk kishte asnjë të lënduar, N.Raci i ishte drejtuar se ‘kësaj radhe boll qekaq, tjetrën herë kemi me të vra krejt’.

Viktima kishte pranuar tretman mjekësor ndërsa në vendin e ngjarjes kanë dalë edhe njësitet policore.

KALLXO.com ka mësuar nga burime brenda organeve të rendit se rasti ishte ri cilësuar në tjetër vepër penale pasi ishin shikuar edhe pamjet e kamerave që janë marrë nga vendi i ngjarjes.

Arrestimi i Musliut nuk ishte bërë në natën kritike por më 04.04.2025. Në raportin ditor të policisë të datës 05.04.2025 thuhet se Musliu mori pjesë në rrahje.

“Pjesëmarrje në rrahje, Istog 02.04.2025 – 18:58.  Në lidhje me rastin, më 04.04.2025 është arrestuar i dyshuari mashkull  kosovar. Me vendim të prokurorit i dyshuari është dërguar në mbajtje”- thuhet në raportin policor.

Deri më tani siç mëson KALLXO.com personi i cili u pa me armë deri sa godiste viktimën brenda lokalit vazhdon të jetë në kërkim nga policia.

Në rastin që ndodhi më 2 prill, pati edhe shkrepje të armës por që nuk u raportua për të lënduar nga plumbat.

KALLXO.com ka kontaktuar edhe me Prokurorinë në Pejë në lidhje me rastin.

Shkodran Nikçi, zëdhënës në Prokurorinë e Pejës, ka thënë për KALLXO.com se personi tashmë i përfshirë në këtë rast L.Musliu është arrestuar dhe ndaluar për veprën penale shkaktim i rrezikut të përgjithshëm dhe pjesëmarrje në rrahje.

“I njëjti deri sa është intervistuar nga hetuesit policor, i ka pranuar veprat penale të cilat i vihen në barrë. Pas analizimit të provave të cilat janë marrë në vendin e ngjarjes, prokurori do ta ri- kualifikoj këtë vepër penale pasi të arrestohet edhe personi i dytë i cili gjendet në arrati për momentin. Pasi të pranohet kallëzimi penal do të analizohet në hollësi nëse do të kërkohet masa e sigurisë për të siguruar prezencën e të pandehurit në procedurë penale”- tha Nikçi për KALLXO.com.