Një balonë e dyshuar kineze fluturon mbi SHBA
Një balonë spiune kineze ka fluturuar mbi Shtetet e Bashkuara për disa ditë, thanë zyrtarët amerikanë të enjten, në atë që do të ishte një veprim i turpshëm vetëm disa ditë përpara një udhëtimi të planifikuar në Pekin nga Sekretari amerikan i Shtetit Antony Blinken.
Avionët luftarakë u mobilizuan, por udhëheqësit ushtarakë e këshilluan presidentin Joe Biden që të mos e rrëzojë balonën nga qielli nga frika se mbeturinat mund të përbënin një kërcënim sigurie, këshilla të cilat Biden i pranoi, thanë zyrtarët amerikanë.
Shtetet e Bashkuara e morën “mbrojtjen” e balonës kur e njëjta u fut në hapësirën ajrore të SHBA dhe e kishin vëzhguar atë me avionë ushtarakë të pilotuar amerikanë, u tha gazetarëve një nga zyrtarët në kushte anonimiteti.
Ndaras nga kjo, ministria e mbrojtjes e Kanadasë tha se u zbulua një “balonë vëzhgimi në lartësi të madhe” dhe se po monitoronte një “incident të dytë të mundshëm”, pa dhënë detaje të mëtejshme, duke shtuar se ishte në kontakt të shpeshtë me Shtetet e Bashkuara.
Lajmi fillimisht u publikua ndërkohë që drejtori i CIA-s, William Burns po fliste në një ngjarje në Universitetin Georgetown të Uashingtonit, ku ai e quajti Kinën “sfidën më të madhe gjeopolitike” me të cilën përballen aktualisht Shtetet e Bashkuara.
“Qeveria e Shteteve të Bashkuara ka zbuluar dhe po gjurmon një balonë vëzhgimi në lartësi të madhe që ndodhet mbi Shtetet e Bashkuara kontinentale tani”- u tha gazetarëve zëdhënësi i Pentagonit, Patrick Ryder.
“Balona aktualisht po udhëton në një lartësi të madhe mbi trafikun ajror komercial dhe nuk paraqet kërcënim ushtarak apo fizik për njerëzit në tokë”.
Zyrtarët amerikanë kanë thënë se e kanë ngritur këtë çështje me homologët e tyre kinezë përmes kanaleve diplomatike. “Ne u kemi komunikuar atyre seriozitetin me të cilin e marrim këtë çështje”- tha një zyrtar amerikan.
Sekretari amerikan i shtetit Blinken pritet të udhëtojë në Kinë javën e ardhshme për një vizitë të dakorduar në nëntor nga Biden dhe presidenti kinez Xi Jinping. Nuk është e qartë nëse zbulimi i balonës spiune mund të ndikojë në këtë vizitë.
Marrëdhëniet midis Kinës dhe Shteteve të Bashkuara janë përkeqësuar vitet e fundit, veçanërisht pas vizitës së kryetares së Dhomës së Përfaqësuesve Nancy Pelosi në Tajvan në gusht.
Që atëherë, Uashingtoni dhe Pekini kanë kërkuar të komunikojnë më shpesh dhe ta parandalojnë përkeqësimin e lidhjeve mes vete.
Balona të tilla zakonisht funksionojnë në 24,000-37,000 m, shumë më lart se ku fluturon trafiku ajror komercial. Avionët luftarakë me performancën më të lartë zakonisht nuk operojnë mbi 19000 m, megjithëse avionët spiunues si U-2 kanë një tavan shërbimi prej 24.000 m ose më shumë.
Craig Singleton, ekspert i Kinës i Fondacionit për Mbrojtjen e Demokracive, tha se balona të tilla janë përdorur gjerësisht nga Shtetet e Bashkuara dhe Bashkimi Sovjetik gjatë Luftës së Ftohtë dhe janë një metodë me kosto të ulët të mbledhjes së inteligjencës.
Balonat spiune kanë fluturuar mbi Shtetet e Bashkuara disa herë në vitet e fundit, por ky balon duket se ka qëndruar më gjatë se në rastet e mëparshme, thotë një nga zyrtarët amerikanë./Reuters
Përgatiti: Nuhi Shala
