Kurti në “Simpoziumin Ndërkombëtar SYMI” në Greqi, përmend edhe kërcënimet e sigurisë

Për çështje e kërcënime të sigurisë, dhe jo vetëm, ka folur shefi i Qeverisë së Kosovës, kryeministri Albin Kurti në edicionin e 26-të të Simpoziumit Ndërkombëtar SYMI, që po mbahet në Greqi.

Në njoftimin e Zyrës së Kryeministrit është thënë se Kurti në fjalën e tij në ceremoninë dhe panelin hapës të simpoziumit potencoi që bota ndodhet përballë tre sfidave globale të një niveli të paprecedent që janë sipas tij ndryshimet klimatike, pabarazia shoqërore dhe kërcënimet e sigurisë.

“Duke vënë theksin te pabarazia shoqërore, Kurti iu referua një studimi të vitit të kaluar të organizatës ndërkombëtare Oxfam sipas së cilës top 1 përqindëshi i më të pasurve posedon 45.6% të pasurisë globale dhe 59% të të gjitha aseteve financiare në botë. Sipas së njëjtës organizatë, në dekadën e fundit, ky 1% ka vënë në zotërim më shumë se gjysmën e të gjithë pasurisë së re globale” – tha ZKM.

Në këtë edicion të 26-të është thënë se po marrin pjesë politikanë progresistë, akademikë të shquar dhe udhëheqës organizatash ndërkombëtare.

“Për aq kohë sa 1% i më të pasurve zotërojnë gjysmën e pasurisë globale, kam drojë që nuk do të ketë paqe të vërtetë ndërmjet shoqërive dhe njerëzve dhe as me natyrën e planetit tonë” – theksoi Kurti.

Ai tutje u tha se foli për rëndësinë e rikthimit dhe ruajtjes së domethënies por edhe konkretizimit të ideve të mëdha të lirisë, barazisë, demokracisë dhe drejtësisë dhe për nevojën për të fituar zgjedhje demokratike në mënyrë që të ketë qeverisje demokratike.

Kryeministri sipas ZKM-së gjithashtu nënvizoi se një gjë e tillë nuk ka qenë më shumë e rëndësishme se sot, në 80 vjetët e fundit, qysh prej përfundimit të Luftës së Dytë Botërore.

“Me pabarazinë gjithmonë e në rritje, gjasat për diktatura dhe fashizëm janë po ashtu në ngritje, tha ai. Në këtë kontekst, kryeministri bëri thirrje për solidaritet më të madh për organizim më të mirë, fitore më të shumta demokratike dhe qeverisje më të gjata të progresistëve e socialdemokratëve, duke mos harruar që demokratët ndihen të kërcënuar nga lufta, kurse autokratët nga paqja” – theksohet në njoftim.

Po ashtu tutje shtohet se Kurti tha se paqja që na duhet është një paqe demokratike dhe demokracia që na duhet është socialdemokracia.

Simpoziumi Ndërkombëtar SYMI është themeluar nga ish-Kryeministri i Greqisë, George Papandreou dhe organizohet në baza vjetore. Edicioni i këtij viti titullohet “Hyni në të ardhmen – Prometheu i lirë: Fuqia e riimagjinuar për një Demos të Paqes, Barazisë dhe Qëndrueshmërisë”.