KEDS kap një biznes në Suharekë duke vjedhur rrymën për prodhimin e kriptovalutave

Kompania KEDS ka njoftuar se në fshatin Mushtisht të Suharekës ka kapur një biznes duke vjedhur energjinë elektrike, për prodhimin e kriptovalutave.

Përmes një njoftimi për media, KEDS-i ka thënë se vlera e dëmit të shkaktuar si pasojë e “mihjes” është 43,745 euro.

“Ekipi i specializuar për kontroll ia zbuloi biznesin ilegal këtij sipërmarrësi inovativ – duke e detyruar t’ia rikthejë KEDS-it 43,745.44 euro. Përtej kësaj, ky konsumator do të përballet edhe me masa ligjore nga autoritetet gjyqësore të vendit, të cilat parashohin gjobë dhe burgim deri në tri vjet për keqpërdoruesit e energjisë elektrike.” – thuhet në njoftimin e KEDS-it.