Javën e dytë të shtatorit, takimi i radhës në Bruksel

Takimi i radhës në kuadër të dialogut Kosovë-Serbi prittë të mbahet në javën e dytë të shtatorit.

Lajmin për KALLXO.com e ka bërë të ditur, zëdhënësi i qeverisë së Kosovës, Përparim Kryeziu.

“Takimet e radhës bilaterale dhe trilaterale në kuadër të procesit të dialogut, në të cilat do të marrë pjesë zëvendëskryeministri Bislimi, priten të mbahen gjatë javës së dytë të shtatorit”, tha Kryeziu.

I pyetur se cilat do të jenë temat e këtij takimi, Kryeziu tha që ende nuk është përcaktuar agjenda.

“Për temat dhe agjendën e takimit, të cilat nuk janë konfirmuar ende, do të ju njoftojmë me kohë”, theksoi ai.

Dje Përfaqësuesi i posaçëm i Bashkimit Evropian në dialogun Kosovë-Serbi, Mirosllav Lajçak, tha të se ka biseduar përmes takimeve të veçanta me zëvendëskryeministrin e Kosovës, Besnik Bislimi dhe Drejtorin e Zyrës për Kosovën në Qeverinë e Serbisë, Petar Petkoviq për përgatitjet e takimit të rradhës në nivel të kryenegociatorëve në kuadër të dialogut ndërmjet Kosovës dhe Serbisë.

Sipas Lajçakut, diskutimet kanë qenë thelbësore për takimin mes delegacioneve që pritet të zhvillohet në fillim të shtatorit.

Kosova dhe Serbia me ndërmjetësimin e Bashkimit Evropian zhvillojnë takime në dy nivele, atë të grupeve negociatore të cilat i udhëheqin, Bislimi dhe Petkoviq, dhe takimet në nivel të udhëheqësve të vendeve, përkatësisht kryeministrit të Kosovës, Albin Kurti dhe presidentit të Serbisë, Aleksandar Vuçiq.