Fundoset varka me emigrantë, vdesin gjashtë persona në Kanalin Anglez

Gjashtë persona kanë vdekur pasi një varkë me emigrantë u fundos në Kanalin Anglez, raporton BBC.

Një operacion i përbashkët shpëtimi nga rojet bregdetare britanike dhe franceze ka shpëtuar 50 të tjerë, thanë autoritetet.

Një numër njerëzish u panë duke u nxjerrë nga një varkë shpëtimi me barela në Dover. Shkalla e lëndimeve të tjera është e paqartë.

Një vullnetar, i cili ishte në një nga varkat e shpëtimit, i tha agjencisë së lajmeve Reuters se emigrantët po përdornin këpucë për të nxjerrë ujin nga varka që po fundosej.

Anne Thorel tha se kishte “shumë” njerëz në varkë.

Kanali anglez është një nga korsitë më të rrezikshme dhe më të ngarkuara të anijeve në botë, me 600 cisterna dhe 200 tragete që kalojnë çdo ditë.

Zyra e Brendshme e Mbretërisë së Bashkuar është kërkuar për më shumë detaje rreth incidentit, ndërsa Sekretarja e Brendshme Suella Braverman ka thënë se ishte një “humbje tragjike e jetës”.

Një tjetër varkë e vogël gjithashtu u fut në vështirësi, por të gjithë në bord u shpëtuan, tha roja bregdetare e Mbretërisë së Bashkuar.

Që nga 10 gushti, 15,826 persona kanë kaluar Kanalin me varka të vogla këtë vit.

Incidenti vjen pasi qeveria e Mbretërisë së Bashkuar përballet me presion mbi frikën e një shpërthimi të Legionella në anijen e saj të re emigrantësh, Bibby Stockholm. Emigrantët e parë që hipën në anije duhej të hiqeshin pasi bakteret u gjetën në sistemin e ujit.

Përgatiti: Xheneta Murtezaj