Promovimi i barnave përmes portaleve fiktive
Deklarata
“Detoksifikimi: një pastrim i përgjithshëm i trupit. Si të eliminosh parazitët, të humbasësh peshë dhe të përmirësosh shëndetin tuaj”
Vlerësimi
Rrenë
Artikulli me titull “Detoksifikimi: një pastrim i përgjithshëm i trupit. Si të eliminosh parazitët, të humbasësh peshë dhe të përmirësosh shëndetin tuaj” nuk është i bazuar në fakte. Në artikull nuk është cituar asnjë burim i identifikueshëm që i mbështet rekomandimet për konsumimin e një ilaçi të caktuar. Faqja në të cilën promovohet ky produkt nuk është një portal edhe pse ka disa rubrika të lajmeve, si: Lajme, Covid-19, Semundje nga A tek Z etj. Secilën rubrikë që e klikon të dërgon te butoni për të porositur produktin. Agjencia e Kosovës për Produkte dhe Pajisje Medicinale ka thënë se produkti që promovohet në këtë shkrim nuk ka autorizim marketingu për shitje në Kosovë.
Artikulli
Më 13 prill 2023, faqja e internetit “lajme mjekësie” ka publikuar një artikull me titullin “Detoksifikimi: një pastrim i përgjithshëm i trupit. Si të eliminosh parazitët, të humbasësh peshë dhe të përmirësosh shëndetin tuaj”.
Ky tekst flet për infeksionet parazite dhe citon një përfaqësues të shoqatës së mjekëve “Jean Merieux”, mirëpo nuk e ka publikuar emrin e atij përfaqësuesi.
I njëjti person, të cilit nuk i përmendet emri, rekomandon të përdoret një produkt i caktuar që thuhet se prodhohet në BE.
KALLXO.com ka kontaktuar edhe me Agjencinë e Kosovës për Produkte dhe Pajisje Medicinale, e cila ka konfirmuar se një produkt i tillë nuk ka autorizim marketingu për shitje në Kosovë.
Faqja në të cilën promovohet ky produkt, në shikim të parë duket si një faqe e portalit, por në fakt nuk është e tillë. Faqja ka disa rubrika të lajmeve, si: Lajme, Covid-19, Semundje nga A tek Z etj. Por, secilën rubrikë që e klikon të dërgon te butoni për të porositur produktin.
Në të njëjtin artikull në fund janë komentet e disa personave që nuk janë realë por janë gjenerime robotike.
