![](https://kallxo.com/wp-content/uploads/2015/12/Gavel_tryeze_532623-e1469459740901.jpg)
Foto-ilustrim
Ferizaj, burg për shoferin që akuzohet se e goditi këmbësorin dhe iku nga vendi i ngjarjes
Gjykata e Ferizajt e ka dënuar me tre vjet burg të pandehurin I.J., i akuzuar se pasi e kishte goditur me veturë viktimën N.M. kishte ikur nga vendi i ngjarjes, duke mos i ofruar ndihmë dhe as nuk e kishte thirrur Policinë dhe Emergjencën.
Aksidenti kishte ndodhur më 31 tetor 2021 rreth orës 22:00 në rrugën Shtime-Ferizaj.
Viktima ishte dërguar në Emergjencën e Ferizajt e prej aty në QKUK, në Prishtinë, ku kishte vdekur një javë më vonë pasi nuk u kishte bërë ballë lëndimeve.
Gjykata e gjeti fajtor të pandehurin në të tri pikat e aktakuzës: rrezikim i trafikut, rrezikim i trafikut publik si dhe mosdhënie e ndihmës personit të lënduar në fatkeqësinë e trafikut.
Palët e pakënaqura do të kenë kohë deri në fund të tetorit ta ankimojnë aktgjykimin në Gjykatën e Apelit, e me vendim të veçantë gjyqtari individual ka vendosur që deri në plotfuqishmërinë e vendimit I. J. të qëndrojë në paraburgim.
Mosdhënia e ndihmës personit të lënduar në fatkeqësinë e trafikut publik është e dënueshme sipas Kodit Penal.
Aty parashihen 3 situata: nëse ngasësi i mjetit të transportit nuk i ofron ndihmë personit të lënduar me atë mjet të transportit, i njëjti do të dënohet me burgim deri në një vit; nëse vepra e njëjtë penale rezulton me lëndim të rëndë trupor, kryesi dënohet me burgim prej tre muaj deri në pesë vjet.
E në rastin si ky me lart, ku mosdhënia e ndihmës ka rezultuar me vdekjen e personit të lënduar, kryesi mund të dënohet me burgim prej gjashtë muaj deri në pesë vjet.
Kodi Penal po ashtu e ka inkriminuar edhe veprën tjetër tjetër të të pandehurit – rrezikimin e trafikut publik për shkak të shkeljes së Ligjit të trafikut ku si rezultat vdes personi, me ç’rast një shkelje e tillë dënohet prej një deri në tetë vite.