Prifti amerikan ia sheh sherrin spotit që iu xhirua në kishë

Një prift i New Yorkut, i cili e lejoi yllin e popit, Sabrina Carpenter, të xhironte skena provokuese për një videospot brenda kishës së tij, është akuzuar për keqmenaxhim dhe është shkarkuar nga detyrat, raporton BBC.

Imzot Jamie Gigantiello u lirua nga “çdo rol mbikëqyrës baritor ose qeverisje” në kishë, thuhet në deklaratën e Dioqezës Katolike Romane e Brooklynit.

Zyrtarët e kishës nisën një hetim pas publikimit të videos muzikore të tetorit 2023 për këngën e Carpenterit, “Father”, të filmuar brenda kishës “Zoja e Mount Carmelit”.

Dioqeza njoftoi se hetimi spikati raste të tjera të keqmenaxhimit përtej videos muzikore që tmerroi disa njerëz, duke përfshirë transferime financiare të pa-aprovuara.

“Jam i pikëlluar të ndaj me ju njoftimin se hetimet e kryera nga ‘Alvarez & Marsal dhe Sullivan & Cromwell LLP’ kanë zbuluar prova të shkeljeve serioze të politikave dhe protokolleve dioqezane”, njoftoi peshkopi Robert Brennan në deklaratë, sipas partnerit mediatik të BBC-së, CBS News.

Tashmë ka një tjetër prift në vend të të shkarkuarit.

Kompetencat administrative të Gigantiellon ishin revokuar nëntorin e kaluar menjëherë pas kritikave ndaj videos së Carpenterit.

Imazhet nga videoja e Carpenter tregojnë një kryq me një blasfemi në të dhe gjithashtu Carpenter duke kërcyer në altar me një fustan të zi të shkurtër.

Dioqeza në atë kohë deklaronte se ishte ” tmerruar” dhe se procedurat e duhura për xhirimet nuk ishin ndjekur, raportoi Associated Press.

Përgatiti: Rexhep Maloku – Kallxo.com