Ministrja Haxhiu reagon pas shifrave të publikuara nga KALLXO.com për krimet seksuale

Ministrja e Drejtësisë, Albulena Haxhiu, ka reaguar pas shifrave të publikuara nga KALLXO.com, të cilat tregojnë numrin e të dënuarve për krimet seksuale, sidomos për parashkrimin e një numri të madh të lëndëve gjyqësore.

Në reagimin e saj në Facebook Haxhiu ka thënë se lidhur me dhunimet seksuale, sipas statistikave, më shumë ka parashkrime të këtyre lëndëve sesa dënim me burgim.

“Situata nuk mund të ndryshojë nëse zyrtarët përgjegjës nuk e marrin ndëshkimin për mosveprim e neglizhencë dhe nëse këto raste nuk trajtohen me prioritet” – ka thënë Haxhiu e cila në reagimin e saj ka theksuar se kushdo që nuk e kryen detyrën duhet të largohet nga detyra.

“Kushëdo që nuk e kryen detyrën, duhet të largohet nga detyra dhe pikë. Nuk kemi fëmijë, vajza dhe gra për t’u dhunuar dhe as për t’u vrarë!” – ka shtuar ministrja.

Ajo ka potencuar se pagat e prokurorëve dhe gjyqtarëve të Kosovës konsiderohen më të lartat në rajon.

Rrjeti Ballkanik për Gazetari Hulumtuese(BIRN) ka analizuar rrjedhën statistikore të lëndëve të krimeve seksuale në gjykatat e Kosovës.

Këto të dhëna tregojnë që për mbi 1,000 denoncime të krimeve seksuale, janë ngritur 521 aktakuza, ndërsa dhunuesit e abuzuesit seksualë në shumicën e rasteve i kanë shpëtuar burgut pasi janë dënuar me gjobë, me kusht ose nuk janë gjykuar fare pasi lëndët e tyre janë vjetërsuar.