Herbariumi i FShMN-së në UP vendoset në indeks ndërkombëtar amerikan

Herbariumi i Fakultetit të Shkencave Matematike-Natyrore të Universitetit të Prishtinës është vendosur në Indeksin ndërkombëtar të Herbariumeve ‘Index Herbariorum’ në Nju Jork, SHBA.

Kështu ka njoftuar UP dhe për të ky është një hap i rëndësishëm drejt ndërkombëtarizimit dhe ngritjes së kredibilitetit shkencor.

Herbariumi është një koleksion i bimëve të ndryshme të cilat janë të thara, identifikuara sipas kategorive e llojeve te tyre, si dhe vendi ku janë mbledhur, e që shërben për të kryer studime në zona të ndryshme.

“Me këtë indeksim ndërkombëtar, Herbariumi i Universitetit tonë do të jetë i barasvlefshëm me herbariumet e njohura shkencore të botës dhe tash e tutje do të njihet me akronimin “UPH” – University of Prishtina Herbarium” – njofton UP, më 05.04.2025.

Sipas UP, për të arritur këtë indeksim, shefi i Herbariumit, profesor Elez Krasniqi dhe asistent Naim Berisha nga Departamenti i Biologjisë (FShMN) kanë kryer një punë të madhe dhe intensive për përgatitjen, sistematizimin dhe dokumentimin e materialeve botanike, duke plotësuar të gjitha kriteret dhe standardet ndërkombëtare të kërkuara.

“Ky sukses është një kontribut i rëndësishëm për komunitetin shkencor në Kosovë që i hap rrugë bashkëpunimeve dhe njohjes më të gjerë ndërkombëtare të kërkimeve botanike që realizohen në vendin tonë” – thotë UP.

UP ka treguar se Herbariumi i Universitetit të Prishtinës pritet të zhvendoset këtë vit në hapësirat e ndërtesës së re të FShMN.