Kurti për vrasjen e rreshterit në Kaçanik: Vrasja e tij do të ndriçohet e kriminelët tinëzarë do të gjykohen e dënohen

Kryeministri në detyrë i Kosovës, Albin Kurti, ka vizituar për ngushëllime familjen e rreshterit të Policisë së Kosovës, Muhamed Lika, i cili u vra në Kaçanik më 01.04.2025. 

Zyra për media e Kryeministrit bën të ditur se Kurti ishte i shoqëruar edhe me ministrin në detyrë të Punëve të Brendshme, Xhelal Sveçlën, dhe zëvendësministrin në detyrë të Mjedisit, Planifikimit Hapësinor dhe Infrastrukturës, Jeton Rakën.

ZKM shkruan se gjatë kësaj vizite tek familjarët, Kurti ka vlerësuar lartë figurën e rreshterit Lika derisa ka thënë se vrasja e tij do të ndriçohet dhe personat përgjegjës do të gjykohen dhe dënohen. 

“Rreshteri Muhamed Lika ka punuar e kontribuar shumë për rendin e ligjin, paqen e sigurinë e qytetarëve dhe shtetit tonë. E para kësaj, është angazhuar e ka kontribuar si luftëtar i UÇK-së për çlirimin e popullit dhe vendit tonë. Vrasja e tij do të ndriçohet e kriminelët tinëzarë do të gjykohen e dënohen. Emri i tij do të rrojë e kujtimi për të nuk do të shlyhet”- citohet të ketë shkruar Kurti në librin e ngushëllimeve për Likën. 

Në mbrëmjen e datës 01.04.2025 u vra rreshteri i Policisë së Kosovës, Muhamed Lika, në ndërtesën ku ai jetonte në Kaçanik.

Për këtë vrasje nuk ka ende të arrestuar, mirëpo kryeprokurori i Prokurorisë së Ferizajt, Burim Çerkini, në një konferencë tha se dy persona dyshohet se kanë marrë pjesë në vrasjen e rreshterit policor.

​Prokuroria: Vrasjen e policit besohet se e kryen dy persona ende të paidentifikuar