Isa Mustafa shërohet nga COVID-19, reagon ndaj atyre që i uruan vdekjen

Kryetari i Lidhjes Demokratike të Kosovës, Isa Mustafa  është shëruar nga virusi COVID-19.

Këtë ai e ka bërë të ditur përmes një njoftimi ku ka shkruar se ka rezultuar negativ nga ky virus. Mustafa kishte rezultuar pozitiv me COVID-19 më 10 korrik.

Në postimin e sotëm, Mustafa ka falënderuar të gjithë ata që e kishin ndihmuar në përballjen më këtë virus dhe janë lutur për shëndetin e tij.

“Miq të nderuar. Dua të ndaj me ju lajmin se kam rezultuar negativ, pas përballjes me Covid-19. Kam nderin të falënderoj gjithë ata që janë lutur për shëndetin tim,” është shprehur Mustafa.

Ai tutje ka përmendur edhe ata që i kishin duartrokitur sëmundjes së tij dhe kishin uruar që ai të vdiste, duke shtuar se ishte tmerruar nga ajo që kishte parë në rrjetet sociale. Sipas Mustafës me disa prej tyre do merret drejtësia.

“Miq të nderuar, kishte edhe të tillë që i duartrokitën sëmundjes time e që uruan vdekjen time. Pati të sojit që sajuan varrimin tim virtual në rrjetet sociale e ma tmerruan një pjesë të familjes e cila nuk ishte në rrjedhë se çfarë ka ndodhur dhe çfarë po ndodhë. Edhe këtyre iu uroj shëndet; fëmijëve dhe familjeve të tyre! Fati ynë ështe që tjetërkush vendosë për jetën tonë, ndërsa me disa merret drejtesia,” ishte shprehur Mustafa.

Më poshtë keni postimin e plotë të Isa Mustafës:

Miq të nderuar
Dua te ndaj me ju lajmin se kam rezultuar negativ, pas perballjes me Covid-19.
Kam nderin të falënderoj gjithë ata që janë lutur për shëndetin tim. Familjen time të mrekullueshme për kujdesin e parreshtur, bashkëshoren Qevseren, vajzën time, doktoreshën Afërditë, djemtë Arbenin e Besnikun dhe nipin tim Metin; motrat dhe vëllezërit.
Një falënderim të veçantë e meritojnë mjekët tanë të fushave të ndryshme që më udhëzuan dhe rekomanduan kur kisha nevojë, prof . Dr Sali Ahmeti, prof. Dr Afrim Gashi, dr. Rexhep Manaj, dr. Valbon Krasniqi, prof. dr. Venera Berisha-Muharemi, dr. Bujar Gjikolli. Mjekët dhe sistemi shëndetësor meritojnë shumë më shumë sesa që ne u ofrojmë.
Falënderoj për mbështetje nga bashkëpunëtorët e LDK-së, kolegët nga ASHAK dhe Universiteti i Prishtinës!
Falënderoj Presidentin Thaçi, Presidenten Jahjaga, Kryeministrin Hoti, Kryeparlamentaren Osmani, Kryetarin e PDK-së, Veseli, Kryetarin e AAK-sê, Haradinaj, Kryetarin e Nismës, Limaj, kryetarin e AKR-së, Pacolli, kryetarin e Prishtinës, Ahmeti, nënkryetaren e Kuvendit nga VV, Nagavci; burrështetasit shqiptarë: Presidentin Ilir Meta, Presidentin, Sali Berisha, Kryeministrin Edi Rama, Kryetarin e PD, Lulzim Basha, Kryetarin e Kuvendit të Shqipërisë, Gramos Ruçi, Sekretarin e PS, Taulant Balla, kryetarin e BDI-së, Ali Ahmeti; si dhe ambasadorin e SHBA-së Kosnett, ambasadorin e Mbretërisë së Bashkuar, Abott, ambasadorin e Italisë, Orlando, ambasadori zviceran, Lebet, deutetë të pozitës dhe opozitës dhe shumë qytetarë për tregimin e kujdesit dhe urimet e tyre për shëndetin tim.