Gjenden 61 qese të vogla me drogë në oborrin e Burgut të Dubravës - FOTO

61 qese të vogla të mbyllura me drogë janë gjetur në oborrin e Burgut të Dubravës.

Rreth orës 11:00, gjatë ditës së sotme, gjatë një bastisje të organizuar nga Departamenti i Sigurimit në Zonën Industriale (sektori i Agrikulturës) afër murit të burgut, është gjetur një qese e madhe me 61 qese të vogla të cilat ishin të mbushura me substanca narkotike.

Pas hapjes së qeses së dyshuar, brenda saj ishin vendosur 61 qese në sasi të vogla, të mbështjella veç e veç.

Qesja me sasi të dyshuar narkotike, dyshohet se është hedhur mbi muri nga pjesa e jashtme e burgut.

Vlen të theksohet se kontrabanda e gjetur është parandaluar të futet brenda zonës së banuar.

Shërbimi Korrektues i Kosovës me anë të një njoftimi ka thënë se mbetet i përkushtuar në luftimin kontrabandës brenda institucioneve korrektuese dhe asnjëherë nuk do të qëndroj duarkryq përballë këtyre dukurive negative të cilat rrezikojnë rendin dhe sigurinë e saj.