AKP miraton listën e aseteve për shitje me tender publik

Agjencia Kosovare e Privatizimit (AKP) njofton se ka miratuar listën e aseteve për shitje me tender publik.

Bordi i Drejtorëve të AKP-së gjatë muajit mars ka mbajtur dy mbledhje në të cilat janë diskutuar dhe miratuar një sërë çështjesh të rëndësishme, siç thuhet në komunikatën e kësaj Agjencie.

“Gjatë muajit mars 2025 Bordi i Drejtorëve të Agjencisë Kosovare të Privatizimit (AKP) ka mbajtur dy mbledhje të rregullta, më 14 dhe 27 mars, në të cilat janë diskutuar dhe miratuar një sërë çështjesh me rëndësi për vazhdimin e proceseve të privatizimit dhe forcimin e qeverisjes institucionale.” – njofton AKP.

Në mbledhjen e parë e cila u mbajt me 14.03.2025, Bordi i AKP-së ka shqyrtuar dhe miratuar Raportin mujor të punës për muajin shkurt, si dhe mori Vendime konkrete lidhur me procedurat e shitjes direkte të aseteve.

Gjithashtu, nga numri i Rekomandimeve të paraqitura për fillimin e shitjeve direkte u aprovuan 42 raste, ndërsa 92 Kërkesa të tjera u refuzuan.

Si dhe u miratuan 19 raste me çmim përfundimtar të shitjes, u trajtuan 3 raste që lidhen me pagesa të vonuara. Bordi shqyrtoi gjithashtu klasifikimin dhe kategorizimin e 8 aseteve në përputhje me Vendimet paraprake – siç bën të ditur AKP.

Ndërkaq në mbledhjen e dytë, më 24.03.2025, Bordi i AKP-së miratoi Kornizën Afatmesme të Shpenzimeve të AKP-së për periudhën 2026–2028, i cili u dorëzua në Ministrinë e Financave, Punës dhe Transfereve, si dhe Pyetësorin e vetëvlerësimit për vitin 2024, i cili po ashtu dorëzohet në MFPT në kuadër të Raportimit vjetor.

Pjesë e diskutimeve në këtë mbledhje ishte edhe lista e aseteve të propozuara për shitje me tender publik përmes Shitjes së Aseteve me Likuidim Nr. 72 (SHAL 72) dhe u morën Vendime për qiradhënien e aseteve dhe transferimin e Kontratave ekzistuese – sipas AKP-së.

Bordi analizoi gjithashtu Raportin e Komisionit për shitjen e banesave të Ndërmarrjeve shoqërore – duke aprovuar dy Kërkesa dhe refuzuar pesë të tjera.

“Një Ndërmarrje e rëndësishme në fokus ishte Bar Bilje në Zubin Potok, për të cilën u caktua statusi ligjor si Ndërmarrje Shoqërore. Po ashtu, Bordi shqyrtoi dhe miratoi Raportin përfundimtar të dorëzuar nga Konsorciumi Curtis, Mallet-Prevost, Colt & Mosle LLP, Grant Thornton Consulting Doo dhe Grant Thornton L.L.C., lidhur me aneks-Kontratën për likuidimin e Ndërmarrjeve shoqërore për periudhën 1 korrik-31 dhjetor 2024.” – njofton AKP.