Foto: AShAK
Shënohet 70-vjetori i Arkivit të Kosovës
Është shënuar sot 70 -vjetori i themelimit të Arkivit të Kosovës, sot Agjencia Shtetërore e Arkivave të Kosovës (AShAK).
Për të shënuar këtë përvjetor, AShAK ka mbajtur një akademi solemne në Teatrin “Faruk Begolli” të Kolegjit AAB.
Bedri Zyberaj, kryeshef ekzekutiv i ASHAK-së ka thënë gjatë fjalës së tij se përkundër vështirësive, sfidave institucion që ai drejton ruan dokumente me vlerë për Kosovën.
“Mosha më e vjetër e dokumenteve që ruhen në arkivin tonë shkon më në thellësi kohore. Dokumenti më i vjetër prej tyre është fjalori në dorëshkrim arabisht –turqisht i 1437”, ka thënë Zyberaj.
Ai ka thënë se arkivat kosovare ruajnë edhe sasi të konsiderueshme të dokumenteve fizike si dhe të mikrofilmave të digjitalizuar.
Zyberaj ka folur edhe për digjitalizimin e materialeve arkivore.
Ndërsa, Ardit Bido drejtor i përgjithshme i Arkivave të Shqipërisë, është shprehur edhe pse të reja ë moshë, arkivat në Tiranë dhe Prishtinë ruajnë një pjesë të rëndësishme të historisë kombëtare.
Arkivi i Kosovës është themeluar më 20 mars 1951.
Pas vitit 1968 filluan të formohen arkivat rajonale dhe ato komunale.