Përgatitja e seancës konstituive, Glauk Konjufca mbledh Kryetarët e subjekteve politike më 8 prill

Kryetari i Kuvendit të Kosovës, Glauk Konjufca, më 08.04.2025, do të mbledhë Kryetarët e subjekteve politike të cilët kanë fituar ulëse në Kuvend, për të përgatitur Rendin e ditës për seancën konstituive.

Kështu ka njoftuar Kuvendi i Kosovës përmes një njoftimi, më 03.04.2025.

Presidentja e Kosovës, Vjosa Osmani e ka caktuar 15 prillin si datë për mbajtjen e kësaj seance.

Rregullorja e Punës së Kuvendit e përcakton që seanca konstituive të udhëhiqet nga Deputeti më i vjetër i shoqëruar nga Deputeti më i ri. Në rast se Deputeti më i vjetër për shkaqe të ndryshme nuk mund ta kryesojë seancën, kjo punë i besohet atij ose asaj që vjen në radhë për nga mosha.

Në legjislaturën e kaluar këtë rol e pati Avni Dehari i LVV-së, i shoqëruar nga bashkëpartiakja Fjolla Ujkani. Dehari e ka fituar sërish mandatin, por ende nuk dihet zyrtarisht se kush do të jetë Deputeti më i ri që do ta bashkëkryesojë seancën, meqenëse nuk është bërë ende regjistrimi i tyre në Kuvend. Megjithatë, pretendohet se Deputetja më e re në këtë legjislaturë është Sala Jashari e PDK-së.

Në fillim të seancës Kryesuesi fton përfaqësuesit e partive parlamentare të propozojnë anëtarët e Komisionit për verifikimin e kuorumit dhe mandateve të deputetëve. Pas kësaj, njëri prej anëtarëve të zgjedhur të Komisionit paraqet Raportin nëse është gjithçka në rregull për të proceduar tutje.

Kur konfirmohet se mandatet janë të rregullta, Kryesuesi i fton deputetët e rinj që të japin betimin solemnisht. Teksti i betimit lexohet nga Kryesuesi i seancës dhe në fund të gjithë përfundojnë me fjalën: Betohem!

Pas betimit, Kryesuesi i seancës i kërkon subjektit me numrin më të madh të deputetëve, që në këtë rast është Lëvizja Vetëvendosje, të propozojë kandidatin për Kryetar të Kuvendit. Nëse partia fituese arrin marrëveshje me partnerë të tjerë dhe siguron votat e shumicës, procesi vazhdon pa pengesa me zgjedhjen e Kryetarit dhe i hap rrugë propozimeve për 5 Nënkryetarët e Kuvendit. Tre prej tyre vijnë nga tri partitë më të mëdha (LVV, PDK, LDK), një nga komuniteti serb dhe një nga komunitetet e tjera joshumicë.

Në bazë të rezultateve të Zgjedhjeve të 9 shkurtit 2025, Lëvizja Vetëvendosje ka marrë 42.30% të votave – duke i siguruar 48 deputetët në Kuvend, Partia Demokratike e Kosovës ka marrë 20.95% të votave apo 24 deputetë, Lidhja Demokratike e Kosovës me 18.27% apo 20 deputetë dhe koalicioni AAK-NISMA 7.06% apo 8 deputetë.

Lista Serbe do t’i ketë 9 deputetë, 1 ulëse nga komuniteti serb e ka fituar partia e Nenad Rashiqit.

10 deputetët e tjerë do të jenë nga komunitetet e tjera joshumicë.

Dy deputetë i ka Kosova Demokratik Turk Partisi dhe me nga një deputet janë partitë: Iniciativa e Re Demokratike e Kosovës, Nova Demokratska Stranka, Socijaldemokratska Unija, Partia Liberale Egjiptiane, Koalicija Vakat, Partia e Ashkalinjve për Integrim, Jedinstvena Goranska Partija dhe Partia Rome e Bashkuar e Kosovës.

Dy ditët e fundit lideri i LVV-së Albin Kurti ka zhvilluar takime konsultative me Kryetarët e partive të komuniteteve joshumicë për formimin e Qeverisë së re.

Edhe partitë opozitare po zhvillojnë takime të ngjashme duke përjashtuar mundësinë për bashkëqeverisje me LVV-në, mirëpo nga asnjëra palë nuk ka asgjë konkrete ende në aspektin e lidhjes së ndonjë marrëveshjeje.