Prokuroria: 3 të arrestuar për sulmin fizik ndaj komisionerit në Mitrovicë
Tre persona janë arrestuar në fshatin Kçiq i Madh të Mitrovicës nën dyshimin se kanë sulmuar një komisioner zgjedhor.
Lajmin për KALLXO.com e ka konfirmuar Njazi Rexha, prokuror i Prokurorisë së Mitrovicës.
“Po ka ndodh një incident ne fshatin Kçiq i Madh me ç’rast është sulmuar një komisioner. Për këtë rast janë arrestuar tre persona”, ka thënë prokurori Rexha.
Lidhur me këtë incident ka reaguar edhe Lidhja Demokratike e Kosovës.
“LDK dënon ashpër sulmin brutal nga aktivistët e PDK-së, kundër Fidan Kamberit, arsimtarit të shkollës fillore “Bislim Imeri” në Kçiq të Madh të Mitrovicës”, thuhet në reagimin e LDK-së.
Kjo partia konfirmon se Fidan Kamberi është vëllai i kryetarit të Degës së LDK-së në Mitrovicë, Safet Kamberi.
“Fidan Kamberi ka qenë i angazhuar nga shkolla “Bislim Imeri” për t’u kujdesur për mbarëvajtjen e procesit zgjedhor. Nga sulmi brutal, ai ka marrë lëndime serioze dhe po trajtohet në emergjencën e Spitalit të Mitrovicës”, thuhet tutje në reagimin.
“LDK-ja kërkon nga organet kompetente kapjen sa më të shpejtë të autorëve të këtij sulmi dhe ndriçimin e motivit të tij. LDK-ja kërkon nga subjektet garuese të ndikojnë për parandalimin e sulmeve të tilla”, thuhet në njoftimin e LDK-së.
