AAK ulë meritat e Hashim Thaçit për rritje rrogash
Në debatin e sotëm, i cili po zhvillohet në ciklin e DebatPernime, kandidatja e Partisë Demokratike të Kosovës për deputete, Blerta Deliu- Kodra, tha se pagat janë rritur nga Hashim Thaçi sa ishte kryeministër.
Kjo deklaratë erdhi pasi që kandidati i AAK-së, Besnik Tahiri tha se rritja e pagave janë suksesi më i madh që i ka ndodhur Kosovës.
Kujtojmë se kryeministri Ramush Haradinaj kishte marrë vendim që të rrisë pagat në Kosovë.
Besnik Tahiri thotë se tani mjekët, policët e shumë të tjerë kanë paga më të mira.
“Pagat është suksesi më i madh i Kosovës. Që 20 vjet pagat e Kosovës nuk janë rritë, polici e ka pagën e dyfishuar, mjeku të dyfishuar, secili shërbyes civil e ka të dyfishuar, tri herë ka shkuar prej qeverisë PDK- LDK- LDK- PDK asnjëherë s’ka kalu. Pagat e asamblistëve janë trefishuar, pagat e kryetarëve janë rritur, shërbimi publik është mëshel. Janë rritur pagat me vendim në 2011 nuk janë rrit me ligj, ka qenë një vendim por jo për krejt sistemin”, tha Tahiri.
E Deliu- Kodra iu kundërpërgjigj duke thënë se pagat janë rritur nga ish- kryeministri Hashim Thaçi, tani ky i fundit president.
“E para vetëm dua të them që nëse dikush ka vendosur standard për rritje pagash është qeverisja Thaçi. Pagat janë rritur në qeverisjen e Hashim Thaçit. Pagat e punonjësve, shërbyesve publik, të atyre shëndetësorë, besoj shumë që këtë e dinë shumë mirë qytetarët e Kosovës”, tha Deliu-Kodra.
Moderatorja Jeta Xharra kërkoi nga Deliu- Kodra të dijë për sektorin privat.
“E sektori privat”, pyeti Xharra.
“Absolutisht është qëndrimi i yni tash në këtë mandat që të kujdesemi edhe për sektorin privat dhe për këtë kemi plan të qartë sa i përket fuqizimit të sektorit privat”, tha Deliu- Kodra.
Të ftuar në debat janë: Arben Gashi -Faton Peci LDK, Mimoza Kusari -Xhelal Sveqla VV, Besnik Tahiri -Donika Kadaj AAK PSD, Zafir Berisha – Arbresha Krasniqi Nisma AKR, Arben Gecaj- Blerta Deliu PDK, Numan Baliq- Fahrudin Megjedoviq SDA.
Cikli i DebatPernime i moderuar nga Jeta Xharra do të mbahen për dhjetë ditë rresht sa do të zgjasë zyrtarisht fushata zgjedhore për zgjedhjet e jashtëzakonshme parlamentare në Kosovë të cilat do të mbahen më 6 tetor.
Kandidatët për kryeministër si dhe kandidatët për deputetë nga partitë të cilat janë në garë do të ballafaqohen para Jeta Xharrës ku edhe do të shpalosen programet qeverisëse.
Debat Pernime do të fillojë çdo ditë nga ora 20:30 në Televizionin 21 dhe live në Facebook të KALLXO.com.
