Zgjedhja e drejtorit të KEK-ut bëhet me asistencën e britanikëve

Korporata Energjetike e Kosovës (KEK) e ka rishpallur për herë të tretë konkursin për Drejtor Menaxhues të kësaj korporate.

Për pozitën e Drejtorit Menaxhues kërkohet që kandidati të ketë së paku 5 vjet përvojë në nivel të menaxhmentit të lartë. Po ashtu kërkohet që të ketë diplomë universitare në lëminë e administrimit të biznesit, ekonomisë, financave, inxhinierisë apo juridik.

“Preferohen individët me përvojë pune në ndërmarrjet tjera me madhësi dhe kompleksitet të lartë”, thuhet në konkursin e rishpallur për Drejtor Menaxhues.

Konkursi i tretë për të zgjedhur Drejtorin Menaxhues të KEK është hapur më 9 gusht dhe do të jetë i hapur deri më 10 shtator 2018.

Ky konkurs do të zhvillohet me asistencën e Ambasadës së Britanisë së Madhe në Kosovë, kurse BIRN do të bëjë monitorimin e këtij procesi të rekrutimit. Përzgjedhja e kandidatëve që kalojnë fazën e parë bëhet në bashkëpunim me ekspertet e rekrutimit të partnerit të angazhuar nga Ambasada Britanike.

Gjatë fazës së intervistimit, komisionit i formuar nga Bordi i Drejtorëve të KEK-ut dhe komisioni i partnerit të Ambasadës bëjnë vlerësime të ndara për secilin kandidatë. Kryeministri i Kosovës, Ramush Haradinaj është zotuar se do të kujdeset që rekomandimet e partnerëve britanik të zbatohen dhe nëpër pozita të larta të emërohen persona më meritor.

Për herë të parë KEK-u ka shpallur konkurs për Drejtor Menaxhues me 5 prill.

Ministria e Zhvillimit Ekonomik (MZhE) përmes një opinioni dërguar Bordit Drejtues (BD) të Korporatës Energjetike të Kosovës (KEK) ka kërkuar që të rishqyrtohet vendimi për konkursin e shpallur me 4 dhe 5 prill për Drejtor Menaxhues, Zyrtar të auditimit të brendshëm, Drejtor Ekzekutiv Financiar dhe Këshilltar i Përgjithshëm/Sekretar të KEK.

Ato kanë kërkuar që fillimisht t’u ndërpritet kontrata personave që janë nëpër këto pozita, e pastaj të shpallet konkursi.

“BD të gjitha veprimet dhe vendimet duhet bazuar në rregullimet ligjore të përcaktuara në legjislacionin që rregullon veprimtarin edhe funksionimin e NP-ve, duke pasur kujdes që të emëruarve paraprakisht u pushojnë të drejtat dhe detyrat nga puna dhe marrëdhënia e punës sipas vlerësimit dhe vendi të jetë i lirë e pastaj të veprohet sipas kërkesave për emërimin dhe zgjedhjen e zyrtarëve të lartë të rregulluar në ligjin për NP”, thuhet në opinionin drejtuar Bordit të KEK-ut nga MZhE.

Konkursi i shpallur me 6 prill 2018 për pozitat, Drejtor Menaxhues, Drejtor Ekzekutiv Financiar dhe Këshilltar i Përgjithshëm/Sekretar i Korporatës është anuluar me vendim të Bordit të Drejtorëve të KEK-ut me 23 maj 2018.

Në mbledhjen e Bordit Drejtues të KEK-ut të mbajtur me 31 maj, Drejtori Menaxhues i deriatëhershëm i KEK, Arben Gjukaj, ka dhënë dorëheqje nga posti i tij.

Menjëherë pas dorëheqjes së Gjukajt, Njazi Thaçi, kushëriri i Presidentit të Kosovës, Hashim Thaçi, është emëruar u.d. Drejtor Menaxhues në KEK.

Korporata Energjetike e Kosovës  ka rishpallur përsëri me 1 qershor konkursin për pozitat Drejtor Menaxhues, Drejtor Ekzekutiv Financiar dhe Këshilltar i Përgjithshëm/Sekretar i Korporatës. Ky konkurs përsëri u anulua.