Vrasja në Pejë- Avokati Kundërshton Aktakuzën

Mbrojta e të akuzuarit Kreshnik Haliti, të akuzuarit për vrasjen e Mentor Zekajt në Pejë më 6 mars 2017 kërkoi hedhjen e aktakuzës, kundërshtimin e provave dhe pushimin e procedurave penale.

Këto kërkesa i paraqiti të shkruara në gjykatë Bahtir Troshupa, avokati i Kreshnik Halitit, ndërsa i bëri të ditura kryetarja e trupit gjykues Lumturie Muhaxheri.

Sipas kërkesave të parashtruara nga avokati Troshupa, ekzistojnë rrethana që e përjashtojnë përgjegjësin penale të Kreshnik Halitit për vrasje të rëndë.

Haliti, sipas kërkesave të parashtruara nga avokati i tij, ditën kritike ka përdorur veprime të domosdoshme në vetëmbrojtje, pasi sipas avokatit kishte pasur vrasje në tentativë ndaj tij nga ana e tash të ndjerit Mentor Zekaj.

Avokati tha se aktakuza është bazuar në prova të papranueshme.

Në anën tjerë, kundërshtimet e mbrojtjes i ka konsideruar të pabaza edhe prokurori i rastit, Ardian Hajdaraj.

Por për prokurorin Ardian Hajdaraj kërkesa për hedhjen poshtë të aktakuzës nga avokati Troshupa është bërë vetëm sipërfaqësisht dhe pa asnjë bazë.

“Pretendimet e mbrojtjes se gjatë shikimit të vendit të ngjarjes nga ana e policisë nuk ka marrë pjesë edhe mbrojtja, janë të paarsyeshme dhe të pabazuara, sepse ditën kritike nuk është ditur identiteti i të dyshuarit, e as identiteti i mbrojtësit të tij”, tha prokurori Hajdaraj.

Edhe avokati i palës se dëmtuar, Gëzim Kollçaku, u pajtua me pretendimet e prokurorit, ndërsa shtoi se mbrojtja e të akuzuarit në asnjë rast nuk ka arsyetuar kundërshtimin e provave të aktakuzës.

Tutje, avokati Bahtri Troshupa, duke arsyetuar kundërshtimet e provave të aktakuzës, përmendi rrethanën se në vendin e ngjarjes nuk ka qenë prezent as gjyqtari, duke kërkuar që edhe procesverbali i vendit të ngjarjes të shpallet provë e papranueshme.

Edhe deklarata e një dëshmitareje, sipas avokatit duhet shpallur e papranueshme në fazat e mëtutjeshme me arsyetimin se ka pasur ndikime në deklaratën e saj nga zyrtarë policorë.

Por prokurori Ardian Hajdaraj tha se deklarimi i dëshmitares i mbetet në vlerësim prokurorisë se a ka qenë i vërtetë apo jo, megjithëse ai shtoi se deklarata e së njëjtës ishte njësoj sikurse në polici, edhe në prokurori.

Prokurori Hajdaraj po ashtu tha se janë joprofesionale dhe joetike deklaratat e avokatit Troshupa në kundërshtimet e aktakuzës se do të bëjë kallëzim penal ndaj dy dëshmitarëve, policëve, dy avokatëve dhe vetë prokurorit.

“Tendenca e tij është e qartë në bazë të kësaj shkrese”, tha prokurori Hajdaraj.

Në këtë proces gjyqësor Kreshnik Haliti akuzohet për vrasje të rëndë të Mentor Zekajt.

Pasditen e 6 marsit të këtij viti, Mentor Zekaj nga të shtënat e armës se zjarrit kishte mbetur i vdekur në lagjen “Fidanishte” të Pejës.

http://kallxo.com/nje-person-vrare-ne-peje/

Në seancën për caktimin e masës së sigurisë, Kreshnik Haliti kishte deklaruar se ndjen keqardhje për rastin e ndodhur dhe se ditën kritike “kishte lindur për së dyti”.

http://kallxo.com/dyshuari-per-vrasjen-ne-peje-kam-lindur-per-se-dyti/

KALLXO.com kishte raportuar një ditë pas vrasjes se borxhi dyshohet të ishte motivi i kësaj vrasjeje.

http://kallxo.com/borxhi-dyshohet-te-jete-motivi-vrasjes-se-djeshme-ne-peje/

KALLXO.com raportoi për mossjelljen e të akuzuarit dy herë në gjykatë nga Njësiti për Përcjelljen e të Burgosurve nga burgu i Dubravës.

http://kallxo.com/serish-shtyhet-gjykimi-per-vrasjen-qe-dyshohet-se-ndodhi-per-nje-borxh/