Ramush Haradinaj dhe Lutfi Haziri
(VIDEO) Haziri dhe Haradinaj ‘zbusin fjalët’ ballë për ballë
Kryeministri i Kosovës Ramush Haradinaj dhe Kryetari i Gjilanit, Lutfi Haziri janë takuar sot në këtë qytet për të diskutuar projektet që e prekin atë zonë.
Ky takim po vjen disa ditë pas një përplasje virtuale mes dy palëve lidhur me çështjen e taksës 100 për qind për produktet serbe dhe për prekjen e kufijve në dialog Kosovë-Serbi.
Në një intervistë për gazetën ‘Express’, Haziri kishte thënë se ‘qeveria do të bjerë bashkë me taksën’.
Pas kësaj, kishte reaguar këshilltari i kryeministrit, Halil Matoshi duke thënë se ‘Lutfi Haziri është një nga këshilltarët e Presidentit Thaçi në këtë çështje, në turrin antikushtetues, për hapjen e çështjes së sovranitetit dhe integritetit territorial, të Republikës së Kosovës’.
Megjithatë, në takimin e sotëm Haradinaj dhe Haziri të buzëqeshur insistuan se sovraniteti territorial i Kosovës është i paprekshëm.
Haradinaj tha se taksa nuk duhet të jetë determinuese për marrëdhëniet Kosovë-ShBA.
“Besoj se tash jemi gati pas taksës, sepse dihet gjendja e taksës, ajo vazhdon të mbetet. Mënyra mos me i prish marrëdhëniet me Amerikën dhe mënyra me i ndreq marrëdhëniet me Serbinë është me i rujtë kufijtë ekzistues”, tha Haradinaj.
Në anën tjetër, Lutfi Haziri tha se nuk del jashta qëndrimeve të LDK-së.
“Qëndrimi im është i njohur por unë kam priotietet e Komunës. Kryetëri i LDK dhe Kryeministri kanë treguar mirëkuptim ndaj qëndrimit tim që është riaktualizu në 2011. Kosova e 17 shkurtit në këto rrethana mbetet e paprekshme. Në Kosovë të gjiithë jemi për dialog për mënyrën kemi dallime”, tha Haziri.