Ndalohen dy persona që tentuan të kalojnë ilegalisht kufirin me mbi 19 mijë kg perime (FOTO)

Në fshatin Vracevo të Leposaviqit, Policia e Kosovës ka ndaluar dy persona të cilët kanë tentuar të kalojnë kufirin ilegalisht me dy kamionë të mbushur me perime.

Njësia policore kufitare gjatë patrullimit të tyre në fshatin Vracevo, ka vërejtur disa kamionë të cilët në rrugë ilegale kanë tentuar që ta kalojnë kufirin.

Pas ndalimit të tyre, njësiti policor gjatë kontrollit ka vërejtur se dy kamionët e ndaluar ishin të ngarkuar me mallra (perime), në sasi prej rreth 18.400 kg domate dhe rreth 710 kg speca.

Policia e Kosovës sipas procedurave të parapara, dy kamionët me mallra i ka dërguar në terminalin doganor, për të vazhduar me procedura të mëtejme.

Pas intervistimit të personave të dyshuar, me urdhër të prokurorit kompetent të njëjtit janë dërguar në mbajtje.