Flamuri amerikan vendoset para hyrjes së Kuvendit, Osmani: Miqësia me Amerikën, referencë e përhershme e Kosovës

Për nder të 244 vjetorit të Pavarësisë së Shteteve të Bashkuara të Amerikës, flamuri amerikan është vendosur para hyrjes së objektit të Kuvendit të Kosovës.

Kryetarja e Kuvendit të Kosovës, Vjosa Osmani dhe ambasadori amerikan Philip Kosnett kanë nderuar flamurin amerikan pas intonimit të himneve të të dy shteteve.

Sipas njoftimit të Kuvendit të Kosovës, flamuri amerikan do të valvitet në hyrje të ndërtesës së Kuvendit deri më 6 korrik.

Kurse, kryetarja Osmani ka uruar popullin amerikan për ditën e pavarësisë së shtetit të tyre, duke rikujtuar që miqësia e Kosovës me ShBA-të është e një rëndësie strategjike dhe e përhershme.

“Vlerat e popullit amerikan, të theksuara në Deklaratën e Pavarësisë së SHBA-ve, nga e cila është frymëzuar edhe Deklarata jonë e Pavarësisë, janë frymëzim yni i përhershëm. Jemi krenar që në krah tonin kemi vendin simbol të demokracisë dhe të të drejtave të njeriut”, thuhet në mesazhin e Osmanit.

Sipas saj, SHBA-të janë përveç se vend mik, edhe partner strategjik i Kosovës në gjithë rrugëtimin tonë për ta bërë Kosovën shtet të pavarur.

“Vendi ynë sot është i lirë edhe shkaku i kontributit të madh të Amerikës, miqësinë me të cilën na e la testament presidenti historik dr.Ibrahim Rugova. Kosova në miqësi të përhershme me Amerikën është referencë e përhershme e jona! Popullit amerikan, urime 4 Korrikun! Zoti e bekoftë Amerikën, Zoti e bekoftë popullin amerikan!”, thuhet në urimin e Osmanit.

Gjatë ditës, edhe presidenti i Kosovës, Hashim Thaçi dhe kryeministri Avdullah Hoti kanë uruar Shtetet e Bashkuara të Amerikës për përvjetorin e tyre të pavarësisë.