Turqia tregti të lirë me Serbinë

Ka hyrë në fuqi Marrëveshja e re për tregti të lirë midis Serbisë e Turqisë.

Rasim Lajiqi, zëvendëskryeministër i Serbisë dhe njëherësh ministër i Tregtisë, Turizmit dhe Telekomunikacionit tha se janë krijuar kushtet që një numër më i madh prodhimesh  të qarkullojë në zonën e lirë të tregtisë, raporton b92.

Falë Marrëveshjes së re për tregti të lirë, sipas Lajiqit, Serbisë për herë të parë i është lejuar eksporti vjetor në Turqi i 5 mijë tonëve të misht të  viçit, 25 mijë tonëve të vajit të papërpunuar të lulediellit, 15 mijë tonëve të farave të lulediellit, 5 mijë tonëve të sojës, 1 mijë tonëve të preparateve që përdoren në ushqyerjen e kafshëve dhe 500 tonëve të produkteve të ndryshme brumore.

“Krahas kuotave për produktet e përmendura, marrëveshja mundëson dyfishimin e kuotave për tregti të lirë të bizeles, groshës, misrit dhe kumbullave të thata”, ka thënë ministri Lajiq.

Lajiq ka thënë se pret që Marrëveshja do të jetë një shtytës i madh për rritjen e eksportit të Serbisë në Turqi dhe zgjerimin e shkëmbimit të mallrave midis dy vendeve, që më 2018 tejkaloi shumën prej një miliard eurosh.

Ministri ka theksuar se të enjten në Beograd kanë nisur bisedimet dyditore për arritjen e Marrëveshjes për tregti të lirë me Unionin Euroaziatik ku bëjnë pjesë Rusia, Bjellorusia, Kazakistani, Armenia dhe Kirgistani, draftimi i së cilës pritet me rastin e vizitës që do t’ia bëjë Serbisë, presidenti i Rusisë, Vladimir Putin, më 17 janar.

“Për një pjesë e mirë e përmbajtjes së kësaj marrëveshjeje ka dakordësi qysh prej raundeve të mëhershme të bisedimeve, dhe ka mbetur që ekspertët të deklarohen edhe për gjashtë linja tarifore”, ka thënë Lajiq.