Turpi kosovar: KGJK nuk e respekton vendimin e gjykatës

Injorimi i vendimeve të Gjykatës nga institucionet në Republikën e Kosovës nuk ka qenë diçka e rrallë, megjithatë, një situatë ku Këshilli Gjyqësor i Kosovës, trupi përgjegjës për funksionimin e gjyqësorit të heshtë dhe të komentojë një kërkesë që rrjedh nga një vendim i gjykatës, nuk ka ndodhur më parë.

Në mbledhjen e mbajtur më 30 maj, disa nga anëtarët e KGJK-sw e kanë kundërshtuar dhënien e qasjes për BIRN në vendimet disiplinore, vendime këto për të cilat gjykata tashmë me vendim të formës së prerë ka vendosur se janë publike.

Edhe pse ishte në pikë të rendit të ditës, disa anëtarë të KGjK-së, i dhanë vetës liri të komentojnë dhe të kundërshtojnë vendimin e plotfuqishëm gjyqësor me të cilin Këshilli Prokurorial i Kosovës ishte i obliguar t’i jepte qasje BIRN-it në vendimet përfundimtare disiplinore duke krijuar kështu një rast të paprecedent në sistemin e drejtësisë në vend.

Rrjeti Ballkanik i Gazetarisë Hulumtuese (BIRN), në vitin 2012 kishte kërkuar nga KPK, qasje në vendimet përfundimtare disiplinore ndërsa kjo kërkesë ishte refuzuar nga KPK. Pas kwsaj, BIRN i ishte drejtuar Gjykatës Themelore të Prishtinës të cilët kishin vendosur në favor të BIRN. Vendimi kishte marrë formën e prerë pasi për të kishte vendosur edhe Gjykata e Apelit.

Mbi bazën e këtij vendimi, BIRN në nëntor të vitit të kaluar kishte kërkuar zbatimin në mënyrë analoge të këtij vendimi edhe nga KGJK dhe në këtë mënyrë t’i jepej qasje BIRN-it në vendimet përfundimtare disiplinore.

BIRN nuk kishte pranuar përgjigje derisa edhe njëherë më 5 maj të këtij viti e kishte ridërguar kërkesën në KGjK, dhe si rrjedhojë kishte pranuar përgjigje që kërkesa e BIRN për qasje në vendimet përfundimtare disiplinore do të trajtohet më 30 maj në mbledhjen e Këshillit.

Fillimisht, i pari që kundërshtoi zbatimin e vendimit të gjykatës ishte anëtari i KGjK-së, Armend Berisha, i cili kontestimin e tij e nisi me një veprim (ai nxori nga goja një çamçakëz dhe e hodhi), për të cilin të paktën që nga banka e shkollës fillore mësohet se është e ndaluar ta bësh sepse ndëshkohesh.

“Vendimi i Gjykatës së Apelit e hedh ankesën e KPK-së si të pas-afatshme dhe nuk lëshohet në çështje të meritave dhe unë i kam pa këto vendime. Prej përvojës që po  e përmend gjyqtarja Manushe (Karaqi) të vizitës në Itali dhe e kemi konsultu edhe një kolege nga Franca, ata nuk po i jepshin emrat e gjyqtarëve. I publikojnë qysh i publikojmë na, në mënyrë të anonimizuar”, tha Berisha.

Berisha, vazhdoi edhe më tej duke shprehur kundërshtimin e tij këtë herë me anë të një mendimi personal.

“Mendimi im personal është ky: le të mendon kush çka të dojë por në atë minutë që e publikojmë emrin dhe emrin dhe mbiemrin ai gjyqtar nuk di qysh ka me gjyku. Është pak problem. Tash ne jemi këtu me marrë kapak edhe qëndrime e vendime që s’janë shumë popullore por që janë të drejta”, tha Berisha.

Përpos, Berishës, kërkesën e BIRN të bazuar në vendimin e Gjykatës e kundërshtuan edhe anëtaret Mkaifete Saliuka dhe Manushe Karaqi.

Duke parë këto kundërshtime, çështja nuk u hodh fare në votim por u vendos që “analizohet”, edhe më tej dhe anëtarëve të KGjK-së t’u jepen vendimet e Themelores dhe Apelit në lidhje me këtë çështje.

BIRN synon që përmes qasjes në vendimet përfundimtare disiplinore të gjyqtarëve dhe prokurorëve të pasqyrojë etikën e gjyqtarëve dhe prokurorëve dhe para së gjithash të pasqyrojë se sa profesionalë janë gjyqtarët dhe prokurorët tanë në Kosovë.

Aktualisht, Projektligji për Përgjegjësinë Disiplinore të Gjyqtarëve dhe Prokurorëve, është në procedurën e draftimit, ndërsa drafti parasheh që vendimet përfundimtare disiplinore të gjyqtarëve dhe prokurorëve të jenë publike.

Megjithatë, hezitimi i anëtarëve të Këshillit Gjyqësor të Kosovës për të dhënë qasje në këto vendime mbase tregon se duan të mbajnë larg syve të publikut vendimet nga e kaluara dhe të bëjnë një ndarje kohore në momentin e hyrjes në fuqi të ligjit të ri.

BIRN do të vazhdojë të kërkojë qasje në vendimet përfundimtare disiplinore dhe nëse kjo nuk ndodh do t’u drejtohet organeve përgjegjëse në Kosovë.