Presidenti i Kosovës, Hashim Thaçi .rel
Thaçi mbështet ekipin e Fatmir Limajt e Shpend Ahmetit
Presidenti i Kosovës, Hashim Thaçi që muajt e fundit ka luajtur rolin udhëheqës të bisedimeve Kosovë-Serbi ka përshëndetur formimin e një delegacioni negociues sot në Kuvendin e Kosovës.
Miratimi i rezolutës së propozuar nga Partia Socialdemokrate bëri që të zgjidhen 12 anëtarë të një ekipi negociator që do të udhëhiqet nga Shpend Ahmeti, Kryetar i PSD-së dhe Fatmir Limaj nga Nisma Socialdemokrate.
Në një postim në Twitter, Thaçi ka thënë se mirëpret bashkëpunimin me ta për të arritur një marrëveshje finale me Serbinë.
“E mirëpres vendimin e rëndësishëm të krijimit të ekipit negociator për dialogun Kosovë-Serbi që do të udhëhiqet nga Z.Ahmeti dhe Z.Limaj. Mirëpres punën e përbashkët me ta për të arritur marrëveshjen finale që do të hap dyert e BE-së, OKB-së dhe NATO-s për Kosovën”, shkroi Thaçi në Twitter.
Me 59 vota për dhe dy abstenime, Kuvendi i Kosovës ka miratuar projekt-rezolutën për dialogun mes Kosovës dhe Serbisë.
Kjo seancë ishte ishte paraparë të fillojë në orën 14 në lidhje me projekt-rezolutën e propozuar nga ana e koalicionit qeverisës PAN dhe PSD-së, për dialogun me Serbinë dhe themelimin e grupit negociator për dialog.
Këtë seancë e bojkotuan LDK dhe LVV.